Vuelonan a yega un tras di otro:
- Rij enorme pa pasa door di Inmigracion
- Hasta dificil pa haya taxi
ORANJESTAD (AAN) Aunke ta parce cu ta normal cu den fin di siman Aeropuerto Reina Beatrix ta haya un fluho grandi di pasahero, tanto cu ta sali for di Aruba como esnan cu ta yega Aruba, tin hende cu a comenta na DIARIO, cu Diadomingo banda di merdia, e situacion tabata masha fastioso pa esnan cu tabata yegando pa check in den e area local.
Segun un par di version, no tabata tin suficiente personal pa atende cu e fluho grandi di pasahero cu tabata yegando den e diferente vuelonan cu, practicamente, a yega un tras di otro.
Pa colmo un aerolinea cu ta bula directo entre Aruba y Medellin, cu a yega precies na ora stipula, no por a haya un lugar pa para riba pista. A keda pega pa un rato largo y e pasaheronan a cuminza perde pasenshi, te cu por fin a manda un bus riba pista pa transporta e pasaheronan aki na e parti di Inmigracion pa drenta Aruba. Hopi hende local cu tabata tin mucha cu nan, y algun persona riba rolstoel, cu por asumi cu tabata biniendo di haya tratamento medico na Medellin, a sinti hopi cansa y hasta a bira tiki nervioso di a keda warda tanto rato den e avion.
Ora bay den rij nan a tarda masha. Tabata tin diferente vuelo cu a yega casi pareu, tanto di Medellin y Cali como di Bogota ademas di e aerolineanan Mericano, jetBlue, entre otro.
Rij largo pa Taxi: Esnan cu mester a busca taxi, tambe no a haye facil, pasobra ta cantidad di hende tabata para pafo di entrada di aeropuerto pura pa haya taxi. Claro, di otro banda mester ta contento cu den temporada baha Aruba ta hopi bishita pasobra di turismo Aruba su economia ta depende.
Pero enberdad, pa tur cos tin solucion y na final di dia cada ken a yega su destino, su hotel, cas di famia of amistad.
Potretnan ta cortesia di un pasahero local mustrando e rij largo pa haya Taxi riba Diadomingo merdia.
