Rotary Club Aruba ta instala a prome Peace Pole bou di awa na Tres Trapi

Acercando Dia Internacional di Paz

ORANJESTAD (AAN):  Dialuna 15 di september, den un gesto bunita cu ta combina conscientisacion ambiental cu un mensahe universal di paz, Rotary Club Aruba a instala e prome Peace Pole di mundo cu ta bou awa na un di e luganan natural mas emblematico di nos isla, Tres Trapi.

Peace Pole ta parti di un iniciativa mundial respalda pa Rotary International cu ta carga e mensahe universal “Cu paz prevalece na Mundo” den varios idioma. Ya tin mas di 250,000 Peace Pole instala rond di mundo. Aruba ta keda den historia como e prome pais cu ta instala uno den lama.

Dia 21 di september, Dia International di Paz, mundo ta para keto riba e tema aki den diferente forma pa eleva conscientisacion di humanidad pa paz prevalece. Cu e instalacion unico aki, Aruba ta uni na e yamada mundial pa paz cu lo ta marca como un recordatorio pa tur Arubiano como pa nos bishitantenan cu paz ta cuminsa prome cu nos mes.