Prome Minister Mike Eman cu dos dia di bishita na Raad van State

A sinta cu Tom de Graaf y Andy Lee

ORANJESTAD (AAN): Durante su bishita di trabao na Hulanda, Prome Minister mr. Mike Eman, a reuni cu varios politico prominente di Hulanda. Esaki a inclui tambe un reunion extenso cu Vice-Presidente di Raad van State, Sr. Tom de Graaf.

   Formalmente e presidente di Raad van State ta e Rey, pero den funcionamento, e vice-presidente ta encarga pa dirigi e trabao di Raad van State. E Rey ta participa si den e reunionnan di Raad van State pero no tin derecho di voto.

   Prome Minister mr. Mike Eman a duna un comparacion riba locual ta trata e Raad van State na Hulanda cu locual cu nos tin na Aruba, cual ta e Raad van Advies. Na momento cu tin un producto di ley, e ta pasa pa e organo di conseho aki cu ta sumamente importante, cu ta duna su puntonan di bista.

   Raad van State ta un entidad independiente cu ta atende cu temanan cu no ta cubri suficiente den un ley, adaptacion den un ley y hasta leynan cu den su totalidad no ta adecua pa pasa. Esaki sigur ta di sumo importancia. Un instituto independiente, profesional, cientifico, cu ta duna opinion los for di e forsanan politico na Hulanda.

   Raad van State durante añanan di Status Aparte, na diferente ocasion a duna varios conseho na momento di diferencia di opinion cu Gobierno di Reino/ Rijksministerraad, hopi bes na fabor di interpretacion di Aruba.

   Premier Eman a indica cu Raad van State semper tabata un instituto di hopi respet, cu prominentenan grandi di pais Aruba den Raad van State, entre otro Sr.Maduro, tambe prominente cu a marca historia den tur locual cu tin di haber cu leynan constitucional di Reino Hulandes, cu ta Sr. Mito Croes, como tambe Señora Schwengle cu tambe a hunga un rol importante pa locual ta trata e Rijkswet entrega awo na Rijksministerraad, y na e momento aki Sr. Andy Lee.

   Dialuna durante dia a combersa ampliamente cu Sr. de Graaf, mientras cu e dia siguiente a duna atencion special na e staatsraad lid, cu ta di Aruba den Raad van State.

   Andy Lee ta un profesional na prome luga, haciendo e trabao independientemente di e pais cu a apunt’e, pero semper ta keda e relacion cu e islanan, como cu e contribucion cu un staatsraad di e islanann ta duna, un perspectiva tambe na mesa con pa interpreta un ley den contexto di nos islanan. Specificamente di Aruba, ora ta trata e input di Sr. Lee.

   A hiba un combersacion amplio cu Sr. Lee, y ta contento di por a intercambia y conoce di su banda kico ta e leynan cu ta na caminda, importancia y implicacionnan pa Aruba y e otro islanan. Di otro banda kico ta e vision di e gabinete aki pa un Reino cu ta bay enfoca riba unda tin e balornan agrega, entre e islanan pa asina hacie un Reino real, caminda e interes/ bienestar di tur e islanan, specificamente esun di Aruba cu Hulanda lo keda prominentemente presente den decisionnan cu lo keda tuma.