Vocero di DIMP, Meverly Romano:
*Ta habri posibilidad pa cuminza paga 50 florin pa luna prome cu 31 Januari
ORANJESTAD (AAN)—Relacionista Publico di Departamento di Impuesto Aruba, señora Meverly Romano, a anuncia den un encuentro reciente cu prensa, cu na e momentonan aki DIMP ta test pagonan di impuesto di vehiculo di motor di aña 2026.
El a bisa cu manera a bira un custumber caba, na September di cada aña DIMP ta habri e posibilidad di pago di impuesto di aña 2026, pasobra no tin halamento di fecha mas.
“Antes nos tabata hala fecha, 30 di Januari ta yega, nos ta hala fecha pa 5 of 15 di februari , pero awo no tin esey mas. Loke nos ta yuda e contribuyentenan ta cu facilita nan un espacio, extende, of habri un termino mas largo pa nan cuminza paga nan impuesto”, el a splica.
Pasobra durante tur e lunanan aki, DIMP a mira contribuyentenan cu a keda cuater of cinco aña sin paga nan impuesto. Anto, na dado momento pa nan por haya nan plachi, nan mester a paga dos mil, of tres mil florin, di debe atrasa. Enberdad ta sumanan hopi halto pero innecesario, pasobra DIMP semper ta anuncia kico ta bay ta e deadline.
“Si bo paga despues di e deadline, e boet ta 50%. E debe ta keda eynan, e interes ta bin acerca. E no ta cumbini pa suspende e pago. Queda sin paga no ta un opcion! Asina e ta! Esey ta e realidad!” señora Romano a acentua.
Locual DIMP ta haciendo aworaki y ta haciendo ya pa un par di aña, y dentro di poco nan lo anuncia ki fecha por cuminza paga aña 2026, cu 50 florin mes pa luna, di tal forma cu pa ora 31 di januari yega nan tin nan impuesto, alomenos, e prome pago haci.
