Minister Cicilia a reconfirma compromiso pa sigui inverti den e sector di crucero

Durante e prome evento di PAMAC na Aruba

ORANJESTAD (AAN): Dialuna anochi a tuma luga e prome di e varios evento di Platinum Associate Membership Advisory Council (PAMAC) na Aruba. E topnan di e sector di crucero ta topa otro den un solo conferencia, cual tin un duracion di tres dia. E aña aki, Aruba ta anfitrion di e conferencia importante aki. E evento ta organisa pa Florida-Caribbean Cruise Association (FCCA) pero p’e edicion aki ta conta cu sosten di ATA y APA. 

            Minister di Turismo, mr. Wendrick Cicilia tabatin e honor pa duna inicio n’e prome evento p’e siman aki. Na inicio, e minister a cuminsa na introduci su mes n’e publico presente. Durante algun combersacion cu e mandatario a sostene cu e ehecutivonan di e sector di crucero, a comenta n’e minister cu, nan ta un solo famia. Ta netamente locual cu Aruba ta balora, famia. T’e deseo di e mandatario pa cada un di e participantenan sinti nan mes na cas. 

            E mandatario durante su introduccion, a duna balor na tur e ‘stakeholders’ di Aruba. E sector di crucero a contribui grandemente n’e desaroyo di pais Aruba. Na nomber di Gobierno di Aruba, a reconfirma e compromiso pa sigui inverti no solamente den e experiencia di e bishitantenan pero tambe den e relacion cu su partnernan. E mandatario a sigura n’e ehecutivonan cu Aruba lo percura pa e huespednan sigui tin un experencia di excelencia na momento di bishita Aruba. 

            “Ban sigui traha hunto”, asina e mandatario a propone n’e topnan di e sector. El a tuma un momento pa reconoce e trabaonan duro y impresionante di CEO di ATA, Ronella Croes y e CEO di APA, Marc Figaroa kende a haci e edicion di PAMAC na Aruba posibel. No obstante cu Aruba tin un gobierno nobo, tin un compromiso pa sigui traha rib’e exito di e producto Aruba.

            Marie McKenzie ta vice-presidente di asuntonan gubernamental pa Carnival Cruises.  Durante e prome evento di PAMAC na Aruba el a indica cu e ta categorisa e edicion aki como uno di sumo importancia. El a indica cu el a bishita Aruba algun biaha caba, pero e biaha aki ta uno special. 

            P’e ocasion aki nan lo ricibi e oportunidad pa experiencia Aruba di un otro forma. Lo siña conoce Aruba cu di cerca. Durante un combersacion entre e ehecutivo di Carnival Cruises y Minister Cicilia, a expresa cu apart di ta responsabel p’e ministerio di turismo, e encarga tambe cu labor. E mandatario a indica cu, ta su vision pa e mercado laboral por sigui brinda e servicio di nivel n’e pasaheronan di e sector. “E vision di e minister ta alinea cu nos vision. Carnival Cruises ta comprometi cu Aruba. E letter A den ABC nunca lo keda afo for di nos vision” asina Marie McKenzie vice-presidente di asuntonan gubernamental pa Carnival Cruises a expresa. 

            Di otro banda, CEO di Florida-Caribbean Cruise Association (FCCA), Michele Paige tambe a vocifera cu Aruba ta un berdadero aliado cu tur hende mester tin. Tin varios factor dicon e ta pensa asina. Pa cuminsa, ta aprecia otro, na di dos luga ta traha duro hunto pa eleva e experiencia di e pasaheronan. Ora mira cua t’e destinacion caminda e pasaheronan ta gasta mas placa, Aruba ta resalta na di dos luga. “Nos a papia cu Prome Minister den pasado caba pero cu e minister nobo, nos ta optimista pa tin un bon relacion cu ne” asina Michele Paige a termina bisando.