Ronny Elizabeth cu un bista riba historia di S.U.B.T. na Corsou

ORANJESTAD (AAN): Señor Ronny Elizabeth biba na Aruba, cu un gran pasion pa deporte y arte,

a dedica hopi aña ta sigui e desaroyo di Sport Unie Brion Trappers (SUBT), un di e clubnan di futbol mas conoci y un di e promenan na Corsou. Como fanatico leal di SUBT, señor Elizabeth ta comparti su conocimento di e historia di 100 aña di e club, su logronan, y e papel importante cu SUBT te ainda tin den comunidad di futbol na Corsou.

   SUBT a wordo funda na september 1925 y ta di dos organisacion di futbolista di Corsou cu ta celebra 100 aña di existencia. Jong Holland tabata e prome organisacion futbolistico di Corsou cu 6 aña pasa a celebra 100 aña di existencia.

   Señor Elizabeth ta conta cu tabata un paar di mucha di  Punda y vecindario cu a bin cu e idea pa lanta un club di futbol. E tempo ey, SUBT y Jong Holland a bira rivalnan grandi den futbol. Ora e dos ekiponan aki topa otro, Corsou tawata paralisa completo.

   Apesar di tawata rivalnan grandi, seleccion di futbol di Corsou ta wordo forma pa hungadornan di SUBT y Jong Holland.

   SUBT ta e unico organisacion deportivo cu e tempo ey tawatin nan propio stadion dentro di ful Antiyas y Caribe. E apertura oficial di stadion di SUBT a tuma luga na september 1948. Prome cu esey, na 1946, ya caba SUBT a bay den un gira na Europa.

SUBT a haya e number di “Barica geelnan di Kintjan”. Y cu orguyo, señor Elizabeth ta expresa cu su defunto papa, cu ta descansa na paz, tabata un gran fanatico di SUBT. Tur diadomingo atardi, e tabata wak su club hunga riba e famoso Seroe di Kintjan. Tabata un bista precioso pa wak e wega gratis.

Na Aruba SUBT y Jong Holland a duna bataya cu clubnan Arubano, esta R.C.A., Aruba Juniors, Jong Aruba, Dakota, Estrella y Clubnan di Surinam. Tambe a haci gira cu Transvaal, Robin Hood, Sony Boys, Heredia y Haiti. E ekiponan di Centro y Sur America tabata tin hopi intercambio di futbol na nivel internacional, na unda cu SUBT tawata participa.

“Cu humildad mi ta sinti mi orguyoso di por participa den e dos organisacionnan aki, señor Elizabeth a expresa.

Na aña 1965 Copa Antiyano cu Jong Holland, R.C.A a bira campeon y Jong Holland a bira sub campeon. Na aña 1969 Copa Antiyano, SUBT a bira campeon di Antiyas y Estrella a bira sub campeon.

“Nos ta yega e centenario di e organisacion di futbol. Un pabien grandi na organisacion di SUBT cu nan 100 aña di existencia: hopi saludo y bendicion pa tur fanaticonan di futbol”, ta e palabranan di Señor Ronny Elizabeth, un fanatico fiel di SUBT.

   Riba potret por mira e.o. Johnny Godfried y Ronny Elizabeth den stadion, y tambe e team completo di Copa Antiyana na aña 1969.