*El a yega di eherce den condicionnan peligroso
ORANJESTAD (AAN)—Matutino DIARIO tabata tin e honor di a entrevista Rabbi Baruch Zeilicovich,
di Beth Israel na Aruba, ken a ricibi un reconocimento hopi mereci, di e Seminario Rabinico Latinoamericano-Doctorado Honorario den Pastoral, y e tin di haber cu su trayectoria como Rabbi, unda el a yega di eherce, bao di e condicionnan peligroso di guera.
“Mi tabata Rabbi den e comunidad di Medellin, Colombia, durante tur e añanan di e guera di Narcotrafico, e Cartel di Medellin cu e Gobierno na unda hende di mi comunidad a wordo asesina, otronan secuestra, anto e tabata un trabao basta dificil y obviamente, mester tabata eynan pa apoya e hendenan. Mi a wordo puntra unabes pakico nos no tabata bay di eynan, si nos no tabata di e lugar ey. Mi a contesta cu pasobra un Rabbi no ta abandona su comunidad, ora mas e tin mester di dje. Nos a keda, y finalmente tur cos a caba, y nos por a yega na Merca, unda mi a bira Presidente di un Rotary Club, na unda nos a yuda henter e comunidad di Fort Worth Texas”, Rabbi Zeilicovich a relata.
Tambe nan a manda rolstoel na hendenan na Puebla, Mexico, a yuda damnificadonan di e teremoto di Haiti, y cu tankinan di 150 liter di awa pa hendenan di Nicaragua cu tabata biba den lugarnan unda no tabata tin awa potable pa nan por a bebe, y na unda muchanan tabata muri di “disenteria” cu ta causa pa bebe awa contamina.
“Nos tabata manda tankinan di awa di 150 liter pa nan por a haya filtro y por a bebe awa, sin peligro. Kiermen, tabata un ayudo na un comunidad mucho mas grandi, y naturalmente na esun di Fort Worth Texas, unda mi tabata biba na e momentonan ey.
Mi a traha hopi den ‘Inter Faith’ (relacionnan inter-religioso) formando gruponan, unda nos tur a compronde cu entre mas nos conoce otro, menos prehuicio tin. Y mandando un mensahe na henter e Sociedad, cu cada un por tin e FE cu nan kier, pero nos tur ta yiu di mesun Tata, di mesun Dios, asina ta cu nos tur ta ruman, ban trata nos como ruman!” Rabbi Zeilicovich a relata.
Como Rabbi, su prome Comunidad tabata hustamente na Medellin, na September di aña 1988, y e guera a cuminza na 1989 practicamente, y a caba na December 1993. El a biaha pa Merca pero prome, el a cuminza na Puerto Rico na Juli 1994, el a keda tres aña akinan, y aki el a traha cu e Gobernador y cu e Presidente di Senado di Puerto Rico, na unda el a elabora henter un programa pa tur scol tocante e violencia den television, y cu te awendia e ta wordo transmiti.
