Rode Kruis a atende 274 persona durante Paradanan di Carnaval

ORANJESTAD (AAN): Awor cu Carnaval 71 ta tras di lomba, a tene un reunion na oficina di Crisis Management Office (CMO) pa asina comparti informacion riba tur loke a socede durante e evento cultural grandi na comienso di aña.

   Cuerpo Policial di Aruba a trece informacion dilanti, cu durante Carnaval 71 nan tabatin 47 detencion menos, compara cu e evento di Carnaval 70 di aña pasa.

   Personal di Rode Kruis a trece statistica dilanti, cu durante Carnaval 71 durante tur Parada y Evento, en total nan a atende 274 persona cu un of mas caso di urgencia.

   Fuera di esaki, durante e reunion a cuminza fula tera kico por haci pa asina tur Grupo di Carnaval por disfruta mescos of casi mescos den cantidad di tempo.  Ideanan cu por bay traha riba dje pa cu futuro.

   Tambe den e reunion aki, a duna elogio na tur Departamento y demas stakeholder cu a garantiza pa Carnaval 71 ta uno safe atrobe.

   Organizacion SMAC na su turno tambe a gradici publicamente, tanto KPA, DVG, DTI, DIP, DOW, EMS, CMO, ImSan, Brandweer, Rode Kruis, y Serlimar SG cu a yuda pa Carnaval tabata grandi.