Pa eleva e calidad di servicio cu nan mester brinda:
*No tur hende por paga 2.850 Florin pa luna
ORANJESTAD (AAN) – Minister demisionario Ursell Arends, den su calidad di titular di Asunto di Adulto Mayor, tambe a duna su comentario riba e pregunta cu e pensioen di un adulto mayor cu drenta un cas di cuido, ta keda eyden pa paga su gastonan.
Minister Arends a bisa cu un di e aspectonan cu a constata durante e gobernacion aki, ta cu hopi instancia kier a discuti riba e costo pa brinda e calidad di cuido na e adultonan mayor.
“Y nos no por perde for di bista cu den un cas priva mester paga aworaki entre 2850 te cu 3.250 florin pa luna, pa un adulto mayor por keda. Tin un grupo creciente den nos comunidad cu no tin un pensioen suficiente, solamente tin AOV pesioen, tin ta haya 425 te 635 florin pa luna.
Pues e gap eynan mester bin di un caminda, y hopi biaha e hendenan aki a bin di exterior pa traha den nos pais, pa yuda nos pusha nos economia, y loke nan no tin ta e social vangnet. Nan no tin familiar cu nan. Manera nos a bisa, gobierno mester garantiza cu e cuido ta pagable, accesible y di bon calidad y aworaki, cu nos tin esaki cuantifica, gobierno ya caba a atende cu e tema di calidad, e casnan priva tambe lo yega na remarke pa tin subsidio. Y di e forma aki nos lo eleva e calidad di servicio cu nan ta brinda, pasobra no tur famia por paga e 2850 florin tampoco. Akinan nos ta alivia e famia di e adulto mayor, e adulto mayor mes, pero mas cu tur cos eleva e calidad di cuido cu ta wordo brinda den e casnan priva” e mandatario a bisa.
Minister Arends a subraya cu e aña aki Aruba ta ekipa brinda pa duna cuido na solamente 500 adulto mayor, 200 na SABA y 300 na casnan di cuido priva.
“Y cu e datonan cu tin ta mustra cu e aña aki Aruba mester ta ekipa pa brinda 2.825 adulto mayor servicio di calidad. Y aworaki nos sa cuanto ta costa, y si aki cuater aña nos ta na e mesun discusion aki, esaki ta nifica cu durante e periodo aki, nada a wordo haci!” Minister Arends a vocifera.
