Rob Vermer ta celebra 50 aña di su trabao fotografico cu tremendo proyecto

ORANJESTAD (AAN): Rob Vermeer celebrando 50 aña documentando fotograficamente Aruba su cultura “Fifty years of perpetual light”:

cincuenta aña di luz perpetuo ta e nomber di e proyecto cu ta duna honor na un archivo y coleccion grandi di fotografia cu a ser tuma desde aña 70 door di Rob Vermeer.

Fundador di Checkpoint Color a rescata negativo nan cu tabata tin un largo tempo warda den bahul di recuerdo. Pa asina por duna lus di nobo na fotografia historico di e ultimo cincuenta aña di nos cultura Arubiano.

Por admira den e coleccion diferente miembro di comunidad, farandula caribeño, y paisaje di nos isla. Den formato analogo como tambe digital, usando primordialmente hasselblad, Rob a sa di rescata un cantidad grandi di un valor unico di fotografia cu ta marca e era moderno, pa por visualiza con nos isla su cultura tabata ta den decada setenta.

Hopi di su potretnan por ser mira como artefacto historico, cu a ser uza door di diferente revista di moda conoci manera Vogue. Como tambe ATA pa asina promove nos isla den exterior na comienso di desaroyo turistico na Aruba.

Un proceso di digitalization y curaduria a ser plantea door di Nelson Gonzalez cu tabata e artista/productor encarga di crea un website pa asina publico local como tambe internacional por goza di un variacion di potret nan historico den color como tambe blanco cu preto.

Riba e website por presencia un cortometraje documentario cu ta mustra Rob den accion den studio di checkpoint. Como tambe un manuscrito dunando un contexto artistico y anthropologico na Rob su trabou. Y sin lubida un tienda virtual pa asina por adkiri un fotografia unico di un di nos gran fotografonan local.

Ekipo di produccion ta haciendo maximo esfuerzo pa por brinda pueblo di Aruba un exhibicion bibo den aña venidero. Pero pa cu esaki mester di sosten di comunidad.

 Un danki ta bay na Prins Bernard Cultuur Fonds Caribische Gebied & Mondriaan Fonds cu a haci e prome etapa di e proyecto aki posibel.