DEN HAAG: E corant de Volkskrant a publica siman pasa un raportahe special encuanto un grupo di militantenan hoben extremo-derechista cu kier usa violencia pa asina haci Hulanda ‘blanco’ so.
Ta trata di e ideanan di ‘aceleracionismo’, cu ta conoci tambe como e ‘Siege-cultuur’, un movimento den e extremo-derechista. E organismo di Nationaal Coördinator Terrorismebestrijding en Veiligheid (NCTV) a adverti recientemente encuanto e movimento aki. Nan a descubri cu algun cien hoben Hulandes di entre 12 y 20 aña di edad ta keriendo firmemente den e teoria aki, y ta discutiendo esaki den gruponan di chatroom, segun e corant a indica.
Den e nucleo, e ‘aceleracionismo’ ta trata di basha sociedad den otro. E miembronan di e grupo ta convenci cu e civilizacion di west pa algun tempo caba ta situa den un spiral bayendo abao, y nan kier acelera e proceso aki door di bin cu e.o. atentadonan, polarizacion, y tambe por ehemplo accionnan di sabotahe. Cu esaki nan ta spera di por start y provoca un guera racial, pa despues por establece un etnoestado blanco, segun de Volkskrant.
En general, e pensamento ta cu ‘aceleracionistanan’ ta diferencia di otro movimento di extremo derechista, den nan creencia cu no tin solucion politico. Un di e motibonan ta cu nan ta bisa cu e raza blanco ta birando cada biaha mas y mas chikito di esnan cu por vota. Pues e ora violencia ta e unico opcion cu ta keda, segun nan opinion.
Ya caba, pa prome biaha den historia, tin algun ‘aceleracionista’ na Hulanda dilanti Huez. Dos miembro Hulandes a wordo persigui. Un di e hombernan ta wordo sospecha di a prepara un atentado terorista contra Prome Ministro demisionario Rutte, y tambe di participa den un organizacion terorista y di crea rabia.
Contra e hoben Steven V. di 21 aña, Ministerio Publico a exigi un castigo di prison di 2½ aña di prison, di cual 2 aña ta condicional, y tambe exigi pa e haya castigo di haci trabao. E otro hoben Fabio L. di 20 aña di edad, a exigi castigo di 2 aña di cual 1½ aña ta condicional.
Huez na Rotterdam na final a condena cada uno na 24 luna di prison, di cual 18 luna ta condicional. Steven V. a haya castigo di 240 ora di trabao comunitario, y Fabio L. a haya 200 ora di trabao comunitario.
Den e caso aki, a bin dilanti con Steven V. a pone tanto na 2019 y 2020 den chatroom su idea pa tur weekend mata henter famianan den un cas, y tambe mata ‘niggers’ y a bin cu e idea tambe pa planea e atentado riba Rutte.
