RIU ta fortifica su segmento premium den Caribe

Door di renoba nan prome resort riba e isla

ORANJESTAD (AAN): Un renobacion di 110 miyon Florin a keda cla, y e cambio ta notabel tur caminda.  Esey ta Hotel RIU Palace Aruba, cu den pasado tabata conoci como ‘Aruba Palm Beach Resort’, y cu na comienzo tabata ‘Aruba Sheraton Hotel’.

   Algo cu DIARIO a tuma nota di dje riba Diamars mainta durante un recorido, ta cu awor Hotel RIU Palace Aruba ta introduci un segmento yama ‘Elite Club’.

   Nan a escoge 31 di e cambernan di e resort cu tin mihor bista, y a dicidi na transforma nan den cambernan di ‘Elite Club’.  E servicio premium cu e cadena ta ofrece na su hotelnan RIU Palace y reserva exclusivamente pa adultonan. Ademas, cada uno di e 31 di e cambernan aki tin un pool priva. E huespednan elite tambe tin acceso na un restaurant exclusivo y un area di tuma solo special pa Elite Club cu servicio di bar na canto di lama.  Tambe tin un cocktail lounge den Lobby, cu tin bebidanan caro exclusivo pa esnan di Elite Club.