Muchanan a disfruta di un experiencia educativo y interactivo cu Chispito

ELMAR

ORANJESTAD (AAN): Electra Discovery Tour 2026 a haci su di tres parada na Alpha Explorers Camp na Paradera, caminda e muchanan a disfruta di un experiencia educativo y interactivo rond di seguridad electrico.

Hunto cu Scol Teatro Aruba TRIBI, e muchanan a mira e Poppenkast show di Chispito cu e tema “Switch On Safety”, caminda nan a siña regla importante pa preveni accidente cu coriente den un forma divertido y facil di comprende.

Despues di e show, tur participante a ricibi e figurin oficial di Chispito. E figurin ta mas cu un recuerdo; e a wordo desaroya como un herment educativo pa stimula conversacion entre mayor y mucha tocante seguridad electrico na cas. E packaging tambe ta contene conseho practico di seguridad, pa famianan por sigui lesa, conversa y pone e reglanan na practica hunto.

Cu e iniciativa aki, ELMAR kier yuda haci seguridad electrico un tema di conversacion den famia. Chispito su figurin ta ofrece mayor y mucha un forma simpel pa sigui siña y practica seguridad electrico den nan cas.

Electra Discovery Tour lo sigui su ruta rond di Aruba. E siguiente parada ta Centro di Famia Piedra Plat.