Bishita na Radisson Blu Aruba ta mustra importancia di talento local y un turismo di calidad

Parlamentario Jennifer Arends-Reyes:

ORANJESTAD (AAN):  Parlamentario Jennifer Arends-Reyes ta considera importante pa sali regularmente for di oficina y parlamento pa bishita diferente propiedad turistico na nos isla. E contacto directo cu e sector ta brinda oportunidad pa observa con inversionnan ta desaroya, tende experiencia di e profesionalnan cu ta traha diariamente den turismo y dialoga tocante futuro di nos industria mas importante.

Den e cuadro aki, Arends-Reyes, hunto cu Minister di Turismo Wendrick Cicilia, a bishita Radisson Blu Aruba na Palm Beach, riba invitacion di su General Manager, Luigi Wix-Mata.

E bishita a brinda un bon impresion di e transformacion cu e propiedad a pasa aden. E edificio originalmente tabata destina pa un proyecto di condominium cu no a keda cla, pero cu posteriormente a transforma den un hotel moderno cu a habri su portanan na 2021. Awe, cinco aña despues, Radisson Blu Aruba a establece su mes como un producto distintivo den e zona turistico di Palm Beach.

Un di e aspectonan cu mas a hala atencion di Arends-Reyes durante e bishita tabata e enfoke riba talento local. Radisson Blu Aruba tin un team gerencial completamente local, algo cu, segun e parlamentario, mester yena pueblo di Aruba cu orguyo.

“Esaki ta mustra cu Aruba tin profesionalnan cu e conocemento, experiencia y capacidad necesario pa ocupa posicionnan di responsabilidad y liderato den nos industria hotelero,” Arends-Reyes a expresa.

Pa e parlamentario, inversion den talento local ta un elemento esencial den e siguiente fase di desaroyo turistico di Aruba. Crecemento no por wordo midi solamente den cantidad di bishitante of camber; turismo mester crea oportunidad pa nos propio hende, genera empleo di calidad y ofrece espacio pa profesionalnan Arubiano crece y avansa den nan carera.

Otro aspecto positivo cu Arends-Reyes a destaca ta e atencion cu Radisson Blu Aruba ta duna na sostenibilidad, bienestar y experiencia di e huesped. E propiedad ta combina hospitalidad moderno cu colaboracion cu artista, profesional y pequeño empresario local.

“E tipo di conexion aki cu nos comunidad por haci e experiencia turistico di Aruba ainda mas autentico, mientras cu e beneficio di turismo ta keda sinti tambe entre nos propio hende,” el a indica.

Como Presidente di Comision di Turismo den Parlamento, Arends-Reyes ta considera esencial pa mantene un dialogo directo cu hotelnan, empresarionan, trahadornan y otro partnernan den sector.

“Politica turistico no mester wordo forma solamente for di un oficina. Nos mester sali, observa, tende y compronde e realidad di e sector pa por tuma decisionnan cu ta contribui na un industria mas fuerte y sostenibel.”

Aruba su exito turistico ta construi durante hopi aña. Sinembargo, pa mantene e posicion competitivo aki, tin mester di inversion continuo, innovacion, sostenibilidad y, principalmente, inversion den nos hende.

Arends-Reyes a gradici General Manager Luigi Wix-Mata y henter e team di Radisson Blu Aruba pa e invitacion, hospitalidad y apertura demostra durante e bishita. Segun e parlamentario, e orguyo cu nan ta mustra pa e propiedad, pero specialmente pa nan team local, merece reconocemento.

“Nos meta mester sigui ta un turismo fuerte y competitivo, pero tambe un turismo cu bo por sinti su éxito den nos comunidad y cu ta crea cada bes mas oportunidad pa pueblo di Aruba. Turismo ta nos motor economico, pero nos hende ta e forsa cu ta impulsa e motor,” Arends-Reyes a conclui.