Riba 18 di Maart Raymundo Dijkhoff ta bay tene charla interesante cu nificacion historico importante

ORANJESTAD (AAN): Riba 18 di Maart Museo Arqueologico Nacional Aruba (MANA) ta bay tene un actividad yama Union Cultural y

durante e actividad aki hefe di Departamento di Ciencia di MANA, Drs. Raymundo Dijkhoff, ta bay tene un charla.

Den un entrevista cu DIARIO Dijkhoff a splica cu e lo papia riba Santana Santa Cruz 35 cu ta un serie di ciclo, di cual el a duna un charla caba riba Dia di Betico.

“Den  prome charla mi a trata e experiencianan, e diferente excavacionnan y e impacto enorme cu e ‘research’ aki tabata tin, pasobra e excavacionnan cu a tuma lugar na 2001, 2012 y 2016 ta cambiando historia di Aruba, di e region, di e continente Mericano y di full mundo”, segun e arqueologo.

El  sigui bisa cu dia 18 di Maart e lo repasa brevemente locual el a papia di dje den e prome charla, despues di cual e ta bay papia riba e ‘background’ arqueologico y historico di Santana Santa Cruz 35, pasobra e ta fecha 1620-1810 y nunca documenta.

“Mi ta bay papia despues di e colonizacion y e tradicionnan di entiero, como tambe e teoria y mitologia su tras, pa e hendenan haya un ‘inside look’ den arqueologia, pa mustra con nos ta yega na nos conclusionnan, analisis etc.”, segun Dijkhoff.

El a sigui bisa cu e ta bay repasa tambe e data demografico y e datonan funerario, pa mustra entre otro con e personanan a wordo dera, pa ilustra e cultura di e morto di e indigenanan.

Dijkhoff a indica cu un parti interesante cu e lo papia di dje ta e manera con Spañonan e tempo ey a wordo dera hunto cu indigenanan y kico esaki ta nifica.

Esaki mirando cu na ningun otro parti di mundo cu e Spañonan a coloniza, e Europeonan a wordo haya dera hunto cu indigenanan.

“E tempo ey esaki no tabata permiti pero na Aruba si, pasobra e Caiquetio tabata e unico indigena di un status  protehi, pasobra e tabata indigena di corona Real”, segun Dijkhoff.