Pa di 8 aña consecutivo Aruba a celebra Dia di Hende Muhe cu un conferencia inspirativo

ORANJESTAD (AAN): Diasabra cu a pasa, den un sala completamente yen, Gobierno di Aruba hunto cu nos hende muhenan presente a celebra Dia Internacional di Hende Muhe.

Pa Gabinete Wever-Croes e dia aki ta uno sumamente importante y special y p'esey pa di 8 aña consecutivo ta celebra e dia aki den grandi cu un conferencia dedica na nos hende muhenan.

   E conferencia a inicia e atardi aki cu un bunita cancion Gospel “Bo ta Santo” canta pa Eltienne Yarzagaray. Sigur un cancion hopi emocional cu a "touch" curason di tur nos hende muhenan den e sala.

  Despues di a worde deleita cu e cancion bunita aki, esnan presente por a disfruta di un discurso inspirativo di Prome Minister di Aruba Evelyn Wever-Croes. Den su discurso e mandatario a enfoca riba e topico di liderazgo femenino y e importancia pa prepara nos mucha muhenan pa por asumi posicionnan di liderazgo den futuro. Un discurso hopi detaya na unda Prome Minister a conta hopi di su mesun experiencia personal, y comparti e 4 areanan cu ta yud'e crea un balans den su bida.

   E conferencia a sigui cu un bunita presentacion di Parlamento Hubenil, sigui pa un panel consistiendo di 4 ser femenino professional, Parlamentario Shailini Tromp-Lee, Cynthia Quant Project Manager di Fundacion Contra Violencia Relacional, Susanita La Bella cu ta propietaria di Aruba Experience Café, y Ankie Danker cu ta directora di EPI. Nan a elabora riba e topico di empoderamento den bida real, y e pregunta na nan tabata cua ta e reto di mas grandi den bida y trabao cu nan a enfrenta y con nan a sobrepasa esaki.

  Prome di a tuma un break, a presenta un video inspirativo di Anabel Lurainne Leon, cu ta un influencer Arubiano biba na merca, hopi conoci y stima pa e comunidad di Aruba. Den su video, Anabel a trece un bunita mensahe pa tur e hende muhenan cu tabata presente.

  Despues di un break cortico unda esnan presente por a disfruta di algo di bebe y come, a sigui cu e presentacionnan di Aruba su Minister di Finanzas Xiomara Maduro,  Señora Jennifer van der Biezen cu ta un coach & percussionist, Señora Jeannely Everon cu ta un cancer survivor, Señora Anouk Eman Miss Universe Aruba y Señora Belkys Moreau cu ta un motivational speaker.

   E conferencia aki a conta cu un sala completamente yen, na unda un cantidad grandi di nos hende muhenan a bin hunto pa celebra nan dia special. Prome Minister ta gradici tur esnan cu pa añanan a sostene e conferencia importante aki cu ta Diamonds International, Crown Aruba, Romar Trading, y Aruba Tourism Authority. Tambe Prome Minister ta gradici e motor tras di evento aki cu ta Sandra Suarez, tur esnan cu tabata presente y esnan cu a traha duro pa haci e evento aki un exito total.