Gobierno Wever-Croes a cambia “pais bancarota” den progreso
- Reconocemento di CAft pa Aruba cu necesidad urgente di trahador
- Neo nacionalismo Europeo ta menasa fronteranan habri na Europa
ORANJESTAD (AAN) Na e momentonan aki, paz mundial ta un fantasia y sigur un menasa serio pa sigur bienestar di paisnan chikito y pober, manera for di prome cu 2024 instancianan manera Fondo Monetario Internacional a adverti.
Ta den e situacion aki, Gabinete Evelyn Wever-Croes a skirbi un capitulo di oro den historia di Reino y asina a entrega na e Arubiano e siguransa cu e por progresa na Aruba y no mester busca su bienestar den exterior.
Na 2020 ora e pandemia Covid-19 a bati na porta, e Secretario di Estado Hulandes, Raymond Knops, a declara cu Aruba tabata den estado di bancarota y na su manera a splica, cu Aruba mester biba bou condicionnan di Hulanda.
Raymond Knops a basa su mes riba e situacion cu e prome Gobierno Hulandes di Mark Rutte a permiti di crece, cu tabata e abuso di placa di Pueblo di Aruba dor di Gobierno di Mike Eman, cu Mark Rutte mes a elogia na principio y cu mester a produci un hub pa companianan Hulandes haci negoshi den region di Aruba.
Esaki a hiba Aruba na e desaster di debe nacional y abuso cu proyectonan PPP tempo di Mike Eman, cu a urgi pa Gabinete Wever- Croes hasta confronta cu e desaster di Pandemia, crea un futuro economico, financiero y social pa Aruba.
E logro grandi di Gobierno Evelyn Wever-Croes awe ta base di e documento oficial di e Comision di Supervision di Reino, cu ta mustra riba e maneho finaniero ehemplar di Gobierno Wever-Croes.
Aruba a conoce un recuperacion, cu ta exigi mas man na obra na e pais, na un momento excepcional na mundo y den Reino.
Awor cu economia di Aruba ta exigi hasta pa busca mas trahador cu Aruba lo tin disponibel, alarma ta wordo bati na mundo pa motibo di Guera na Ukraine y confrontacionnan na Medio Oriente cu a bira base pa un posicion nobo di Pueblo votador na paisnan Europeo.
E sentimento nobo di neo nacionalismo, ta exigi pa paisnan Europeo busca solucion pa e migracion cu ta afecta e habitantenan di e paisnan directamente. Migracion y e problemanan relata na e compromiso di Europa y organisacionnan internacional, ta resulta den lidernan Europeo, cu ta dirigi nan mes riba e bienestar di e Europeo, manera DIARIO a adverti.
Kico esaki por nifica? Un pregunta cu awor Aruba mester haci, basa riba loke a bini dilanti prome cu eleccion na Hulanda, cu ta e hecho cu un Hulandes mester di permiso pa traha na Aruba, mientras un Arubiano por bay y disfruta di mes derecho cu e Hulandes na Hulanda y na Europa.
Uno di e derechonan grandi cu e Arubiano tin, ta pa como ciudadano Hulandes goza di e union di Europa, cu na su turno tambe ta produci trahadornan cu ta competi cu e trahador Hulandes.
Pues na momento aki, e migracion (internacional) cu a bira peso grandi pa Hulanda, ta uno di e puntonan riba agenda politico Hulandes, cu na mes momento ta parti di discusion kico mester haci cu Union Europeo, cu ta mishi cu e autoridad cu gobierno Hulandes mester tin.
Den e cuadro aki mester tene na consideracion cu e trahador Arubiano of Europeo na Hulanda, mester por conta cu cas y tur loke ta necesario den bida mescos cu ta e caso cu trahadornan stranhero na Aruba.
Mientras pues problema di Arubianonan na Hulanda ta cuminsa presenta, na Aruba e necesidad di trahador ta crece continuamente.
Pa expertonan aki ta topa pues cu un situacion, cu ta urgi pa haci un estudio con pa atrae e cantidad importante di trahadornan Arubano bon prepara cu ta biba den exterior.
Segun informantenan awor mester bini un rapport di expertonan, cu ta capaz pa ofrece na e Arubiano cu ta traha na Hulanda of Europa, un pakete pa crea nan futuro na Aruba y no pafor di Aruba.
Expertonan ta papia aki atrobe, di un union di gremionan pa riba tur tereno yega na solucion cu ta haci posibel pa baha e cantidad di Arubiano cu ta dicidi pa bay biba na Hulanda y por spera mas problema den futuro, y asina a corto plazo, atende cu e necesidad pa trahador na Aruba.
Den esaki tambe mester bini un cambio di mentalidad enfrente trabou segun cual hende ta discrimina su mes y ta cera porta pa su oportunidadnan na Aruba pero ta acepta di haci e trabou na Hulanda.
Expertonan ta mira posibilidad grandi cu por contesta un reto crea pa e exito economico y financiero di Aruba, cu na 2020 a wordo cualifica como un estado bancarota, a base di e realidad den cual el a wordo hereda dor di Gobierno Evelyn Wever-Croes.
