Revitalisacion di Wilhelminastraat ta continuidad di un proceso pa renoba centro di Oranjestad

Ministro Rene Herde:

ORANJESTAD (AAN): Gobierno di Aruba a inicia un siguiente fase den revitalisacion di Wilhelminastraat, cu firma di contract cu BK Consultant Civiel-Bouwkundig Advies Bureau N.V. pa desaroya e diseño integral di e area y su vecindario. E momento oficial a tuma luga diabierna 18 di september, den presencia di entre otro Prome Minister Mike Eman, Minister di Finansa, Asunto Economico y Sector Primario Geoffrey Wever y Minister di Infrastructura, Energia y Telecomunicacion Rene Herde.

   Cu e paso aki, e proyecto ta move for di fase di vision y seleccion pa diseño final y preparacion tecnico, creando e base necesario pa despues pasa pa ehecucion di e trabaonan.

   Pa Minister Herde, un aspecto importante ta cu e proyecto no ta para su so. E ta continuidad di un proceso di renobacion di centro di Oranjestad cu a cuminsa varios aña pasa y cu gradualmente ta sigui tuma forma.

   “E bunita di e proyecto aki ta cu e ta un continuacion di algo cu a cuminsa añanan pasa, renobacion di centro di ciudad,” Herde a indica.

   Asumiendo su responsabilidad como Minister di Infrastructura, Herde a enfatisa cu e cartera tin un rol esencial den e tipo di proyectonan aki. Revitalisa un parti di ciudad no ta solamente cuestion di aparencia, e ta exigi planificacion y preparacion tecnico pa crea un espacio cu ta funcional y cu por sostene su uzo pa futuro.

   Departamentonan tecnico relaciona cu infrastructura ta participa den diferente fase di proyectonan, por ehempel brindando conseho tecnico, supervision y caminda ta aplica, apoyo den ehecucion.

Segun Herde, esaki ta e manera cu Ministerio di Infrastructura tambe ta contribui na Wilhelminastraat: traha hunto cu e otro carteranan pa transforma e vision den un proyecto cu ta tecnicamente bon prepara.

E diseño cu BK Consult lo sigui desaroya awo ta enfoca, entre otro, riba calidad di espacio publico, mobilidad, funcionalidad, sostenibilidad y conservacion di e identidad historico di Wilhelminastraat. E imagennan presenta durante e ceremonia ta mustra e direccion inicial, mientras cu awo lo sigui e trabao riba diseño final, bestek/plan di construccion y documentacion tecnico.

   Revitalisacion di Wilhelminastraat ta realisa den cooperacion entre Ministerio di Infrastructura, Energia y Telecomunicacion, Ministerio di Finansa, Asunto Economico y Sector Primario y Oficina di Prome Minister.

   Herde a destaca e importancia di e colaboracion aki, caminda cada cartera ta aporta for di su propio responsabilidad. Mientras cu infrastructura ta atende e dimension tecnico y infrastructural, e proyecto ta conecta cu e vision economico mas amplio pa trece actividad, inversion y bida bek den nos centro di ciudad.

   Wilhelminastraat historicamente ta un area caminda vivienda, comercio, gastronomia y actividad social ta topa otro. E intencion ta pa fortalece e caracter propio aki y crea un espacio publico mas funcional, accesibel y atractivo pa residente, comerciante y bishitante. Pa Herde, e siguiente fase ta representa principalmente continuidad: sigui construi riba e trabao cu a cuminsa, prepara e siguiente pasonan debidamente y percura pa infrastructura acompaña e desaroyo cu Gobierno ta proyecta pa centro di ciudad.

   Paso pa paso, vision ta traduci den planificacion y preparacion concreto, cu e meta pa sigui transforma centro di Oranjestad den un espacio cu ta sirbi comunidad y sostene su desaroyo pa futuro.