IVA a enfoca riba maneho di risico den cuido di salud durante conferencia “Risky Business”

Director di IVA, Dorylee Pappers-Penha:

ORANJESTAD (AAN): Diabierna ultimo, Inspectie Volksgezondheid Aruba (IVA) a organisa e di tres edicion di su Quality of Healthcare Conference IVA 2026, bou di e tema “Risky Business.”

Segun director di IVA, Dorylee Pappers-Penha, e meta di e conferencia ta pa reuni representantenan di e veld di cuido y comparti e observacionnan cu IVA a haci durante e ultimo dos añanan di inspeccion. E informacion aki ta sirbi pa identifica topiconan cu mester di mehoracion y determina con e organisacionnan por traha hunto.

E tema central di e conferencia tabata Risk Management: identificacion y maneho di e risiconan mas grandi den un organisacion di cuido.

Segun e director, ta wak y sinti cu ainda no tin suficientemente conscientisacion di e risiconan, ni tin un sistema concreto pa ta prepara pa e momento cu un risico presenta. Intencion ta pa duna atencion na con por haci esaki algo mas structural, pa sa cua ta e risiconan principal.

E director a aclaria cu maneho di risico no ta limita na un remedi of un hospital specifico. E ta aplica na e sistema completo y na tur organisacion cu ta brinda cuido, sea un dokter di cas, un botica of un hospital grandi.

“Ta trata di con bo ta maneha e risiconan den bo organisacion pa, finalmente, preveni daño na e pashent,” el a bisa.

Tocante legislacion, Pappers-Penha a indica cu pa varios aña caba IVA ta expresa su preocupacion cu e ley di remedi ta anticua. Aunke IVA mes no ta traha ley, e organisacion tin un funcion di supervision y ta sigui enfoca riba e tema.

Durante e conferencia, IVA a presenta su Strategisch Meerjarenbeleidsplan 2026–2031, un plan strategico di maneho pa e proximo cinco añanan. Den e plan ta indica con IVA lo sigui desaroya su supervision, teniendo cuenta cu e limitacionnan existente y dunando prioridad na e areanan di mayor importancia.

“Nos kier enfoca riba e risiconan. Nos kier trece cambio den e veld y no haci supervision solamente pa haci supervision,” Pappers-Penha a enfatisa.

IVA lo procesa e informacion y datonan acumula durante e conferencia den un rapport. E enfoke no ta solamente riba e trabou di inspeccion, sino tambe riba e dunadonan di cuido cu diariamente ta aporta na salubridad publico. 

E meta ta pa sostene e organisacionnan cu ta brinda cuido y uza e informacion comparti pa sigui mehora calidad di cuido na Aruba.

“Nos mester keda comunica constantemente. Nos mester sigui ripiti e mensahe y ripiti nos trabou. Nos mester colabora cu otro, pasobra nos no ta solamente un supervisor, sino tambe un partner den e veld,” Pappers-Penha a conclui.