Parlamentario Jennifer Arends-Reyes:
ORANJESTAD (AAN)-- Den entrevista cu Matutino DIARIO, Parlamentario Jennifer Arends-Ruiz a contesta un pregunta, tocante un plan cu tabata tin den pasado, pa traha tambe un pier pa crusero na San Nicolas, y asina por tin un pier na Oranjestad y otro na San Nicolas, y ricibi turismo den ambos ciudad, mescos cu ta e caso na Curacao.
Segun Parlamentario Arends-Reyes, tur esaki tabata den plannan, pero naturalmente pa algo asina mester haci investigacion, con e lo bay den practica.
“Pasobra si nos wak e beach pariba ya caba no kier pa overbelast tampoco, y nos tin cu yega, na cierto momento, na decisionnan unda cu no ta sobrecarga e beachnan cu nos tin. Esey ta un di e puntonan tambe di discusion na e momentonan aki, cu bo ta brindando otro tipo di atraccion pa Aruba, pero e pregunta ta keda e ora ey te con hopi e distribucion ta si bo ta cera e rutanan cu nos tin awo. Dus, tanto pa beachnan, si habri beach nobo tambe ta un opcion, e parti di Bushiri semper a papia di esey, pues nos tin cu tuma decisionnan e ora ey pa yuda e sectornan tambe pa no tin un aglomeracion mucho grandi, na momento cu bo haya cu tin demasiado beach y den e caso aki tambe diferente tour operators tambe, cu ta hunto”, Parlamentaro Arends-Ruiz a señala.
El a reitera cu tur opcion aworaki mester wordo investiga, si enberdad den practica nan lo ta factible. “E debate tey caba y tin diferente ronda ta andando cu tur e stakeholders di parti di Gobierno, naturalmente, y di parti di Parlamento nos ta sigui’e di cerca, pero e ta keda si, un reto cu nos tin cu bay yega, pasobra tur tin cu nan mesun importancia, segun nan ta trece dilanti. Pero como Gobierno y como Parlamento, nos tin cu wak pa full Aruba. Y manera mi a menciona, e parti di sostenibilidad nos a pasa esey caba y nos tin cu bay na e parti regenerativo. E ta fastioso pero ta un discusion sumamente valido pa Pais Aruba”, Parlamentario Arends-Reyes a señala.
