Reunion entre Ministerio di Innovacion y departamentonan clave

Progreso pa E-government:

ORANJESTAD (AAN): Den marco di implementacion di e gran proyecto nacional di E-government, Ministerio di Innovacion a organiza un reunion di coordinacion na oficina di DEZHI cu a reuni tur e departamentonan clave den e proceso aki: DIMAS, CENSO, DIMP y tambe e Stuurgroep Digital Innovation & Automation (SDIA).

   E reunion su obhetivo tabata pa crea consenso entre tur departamento, mustra con cada instancia ta keda parti esencial di e caminda pa implementa un sistema di gobierno digital.

E-Government lo trece un transformacion hopi amplio: e ciudadano aplicando pa un documento oficial, un empresario registrando su negoshi y haciendo pago di impuesto digital.

   Durante e reunion a presenta un plan di trabao pa e prome fase di implementacion. E parti legal ta inclui e preparacion di ley cu mester duna base pa firma digital y pa introduccion di un number unico di persona (NUP). E parti tecnico ta referi na infrastructura di sistema, compatibilidad entre base di dato y e plataforma central di servicio digital.

   Rol di departamento: Esaki ta e rol di diferente departamento: (*) Censo: Como registro di A-nummer y registracion di persona, ta fundamental pa tin e base di dato di ciudadano.  (*) DIMAS: Ta ocupa cu status di residencia y permiso, y su dato mester conecta den un sistema integra. (*) DIMP: Como departamento di impuesto, ta importante pa integracion di pago digital y servicio pa negoshinan.

   Tambe tin: (*) DEZHI: Ta duna sosten y coordinacion pa proyecto grandi y financiamento, sigurando cu tur paso ta den regla y cu recurso ta worde uza cu transparencia. (*) Stuurgroep Digital Innovation & Automation (SDIA): Nan ta guia tur proceso di implementacion, ta facilitado pa e proyecto y ta duna direccion strategico.

    Resultadonan positivo: E cita a mustra un gran interes y compromiso di tur departamento. Representantenan di tur instancia a subraya cu, aunke tin hopi preparacion pa haci, tur ta percibi e proyecto como un oportunidad crucial pa modernisacion na Aruba.

   Den e dialogo a bin na cla cu un Gobierno digital no ta solamente un cuestion di tecnologia, sino un compromiso conhunto pa eficiencia, transparencia y confianza.

   E prome reunion ta solamente e inicio. Durante siguiente lunanan lo sigui cu reunionnan di trabao pa elabora riba e plan detaya, cu deadlines fiho pa cada fase. Preparacion di base legal y infrastructura digital lo tuma prioridad. Den paralelo lo start cu un campaña di comunicacion pa prepara tanto funcionarionan publico y comunidad pa cambionan cu lo tuma luga.

   Ministerio di Innovacion ta enfatisa cu E-government ta un proyecto di pueblo. Su meta ta pa duna servicio mas rapido, menos burocracia y un experencia moderno cu ta refleha realidad di siglo 21. Pueblo lo sigui worde informa paso pa paso, pa tur ciudadano por ta parti di e transformacion digital cu ta hayando forma.

   Ministerio di Innovacion kier a gradici tur departamento cu a participa y ta conta cu nan dedicacion den e prome fase di implementacion. Hunto nos ta hiba Aruba na un nivel nobo di servicio publico – un gobierno di tur ciudadano, pa tur ciudadano.