El a wordo desinfecta tambe caba
ORANJESTAD (AAN): Den e simannan tras di lomba, ekipo di WEB Aruba NV hunto cu contratistanan laborando riba e tanki nobo di awa na Alto Vista, a traha duro riba instalacion di e 793 plachinan di staal bruto precorta y pa despues a seya nan cu un capa di glas, cubriendo un superficie total di 2.827 m².
A completa tur e testnan specializa necesario, incluyendo un vacuum test pa verifica si tin algun lekkage den e vloer. Adicionalmente, e dak di e tanki tambe a wordo inspecciona cu exito pa sigura cu no tin ningun lekkage. Esaki tabata cu ayudo di Brandweer Aruba cu a spuit e dak di e tanki pa por a detecta lekkage.
Despues di un desinfecta e interior di e tanki na forma riguroso, e siman aki cuminsa yena e tanki, cual por tuma casi 18 mil m³ di awa.
Ora e tanki ta na nivel, lo bay start cu e proceso test e calidad di e awa. Esaki lo ta en cooperacion cu laboratorio di WEB y Landslaboratorium. Ora e testmento resulta den calidad segun e standardnan rekeri, lo pone e tanki oficialmente den operacion. Segun planning esaki lo ta prome cu fin di e aña.
Un biaha mas, WEB Aruba ta gradici un y tur pa e pasenshi y comprension. Si abo ta den e area, sea dia of anochi y a nota algo straño of tin algun pregunta, por tuma contacto cu lider di proyecto na 593-0952.
