Reunion di Tripartiet na Corsou tabata exitoso y a avansa cu e geschillenregeling

Parlamentario Endy Croes:

ORANJESTAD (AAN): Parlamentario Endy Croes na regreso a duna un entrevista tocante un reunion cu Delegacion di Aruba a atende na Corsou diahuebs 15 di october. Manera ta conoci prome siman di Juni 2026 tabata tin reunionnan di IKPO na Den Haag Hulanda y un dia prome cu IPKO, delegacionnan di Parlamentonan di Aruba, Corsou y St. Maarten ta reuni den un Tripartiet.

E reunion di diahuebs ultimo na Corsou ta hustamente pa sigui trata puntonan di interes comun entre e 3 islanan cu ta riba agenda manera e geschillenregeling cual concepto finalmente a keda aproba.

Historia di Amienda Wever/Thijsen Geshillenregeling 12 April 2010 :

Durante e proceso unda Corsou y St Maarten a haya nan Status Aparte 10 di october 2010 (conoci como 10-10-10) tanto Aruba como Antillas Hulandes tabata por trece amienda como “Bijzonder Gedeleegerden” den Tweede Kamer. Un proceso unico net prome cu cambio di Statutunan e tempo aya. Dia 12 di April 2010 uzando e oportunidad unico aki Booshi Wever  hunto cu Ady Thijsen (ambos di partido MEP ) a entrega un total di 7 amienda. Entre nan e amienda cu a haya e number #17 den Tweede Kamer cu un cambio proponi den artikel 12a cu ta stipula “ Bij rijkswet worden voorzieningen getroffen voor de behandeling van geschillen tussen het Koninkrijk en de landen.” E amienda Booshi Wever/ AdyThijsen a wordo aproba 12 di April 2010 den Tweede Kamer cu 140 voto na fabor. Solamente PVV cu 10 asiento no a vota na fabor e tempo aya. Despues esaki a wordo aproba tambe den Eerste Kamer. Sigur algo historico. Desde aki y di acuerdo cu e artikel 12a paisnan mester a traha riba e famoso “geschillenregeling” esta un instancia independiente of un tipo di “referee” unda Paisnan den Reino por acudi ora tin diferencia di interpretacion juridico den Statuut. Desde 2010 Hulanda no a keda mucho contento comokiera Hulanda ta sinti cu e ta perde poder si e desicion di dicho instancia ta “bindend” pa Rijksministerraad. Pesey Hulanda cada bes ta “stol” esta retarda e proceso. Awor nos ta asina leew 16 anja despues unda tin un concepto riba mesa cu ta carga e conseho di Raad van State pero tambe consehonan di DWJZ di Aruba-Corsou y St Maarten.

Tripartiet a aproba e concepto final:

Edgard Vrolijk a lidera e Petit comite hunto cu representantenan di Corsou y St Maarten pa haci cambionan sugeri di tur expertonan di paisnan basa riba consehonan legal di instancianan ariba menciona y a presenta e concepto final diahuebs ultimo durante e reunion di Tripartiet den Parlamento na Corsou. Delegacionan di Aruba-Corsou y St Maarten durante Tripartiet a  aproba e concepto final aki unda Parlamentonan di cada pais lo mester bay bek nan Parlamento pa cada Parlamento duna un “steunbrief” pa e concepto aki. Un deadline di 13 di november a wordo palabra unda tur (3) Parlamento mester percura pa e steunbrief di nan Parlamento ta cla y entrega.

Despues di 16 aña finalmente Geschillenregeling ta mirando un luz na final di e tunnel.

No por lubida e esfuerso grandi di entre otro Ady Thijsen desde 2010 riba e tema aki. Kier gradici tur experto y politiconan di Paisnan den Reino y sigur di Aruba-Corsou y St Maarten cu a duna nan aporte na e producto final aki. Danki special tambe na e Petit Comite pa nan gran trabou.  Tin un caminda nos dilanti pa cana ainda como cu esaki mester sigui e trajecto bek pa Tweede Kamer. Pero contento di por forma parti di algo cu lo keda graba como historico den Reino dia esaki wordo aproba. Por considera resultado di Tripartiet uno exitoso y sigur riba e tema aki.