Segun Frans Ponton presidente di CUA:
ORANJESTAD (AAN)-- Den entrevista cu DIARIO, e presidente di Comerciantenan Uni Aruba (CUA), señor Frans Ponson, a señala cu comunidad mester wak, no un bunita papia di cualkier gobierno, sino e berdad, e cosnan cu ta pasando.
Ponson no ta duda cu tin surplus, prijs di gasolin subi mas placa gobierno ta haya, kiermen cu entrada tin suficiente.
“Pero nan kier haci cosnan pa loco, sin estudio. Mi ta duna un ehemplo: comercio ta subsidia coriente pa cas, pero comercio, cu tin cu paga un prijs mas caro, ta subsidia tur airbnb, locual e ta haya cu no ta husto; tur e hendenan cu ta bin di afo, tur e negoshinan ilegal, paga coriente pa tur Airbnb, cierto di nan cu ni ta paga belasting, pero ta subsidia nan, haci e prijs mas caro, nos tin cu subi nos prijs, na lugar di wak berdad ken tin e necesidad. Podise e grupo cu necesidad, mester di coriente, por ta nos no ta subsidia y no tin pa paga coriente. Pero, nos no por subsidia tur hende, pesey estudionan ta hopi importante pa wak ken ta e grupitonan den necesidad, por ta yuda nan bon di berdad, y no haci cos pa loco”, el a bisa.
Tin indicacion cu cierto companianan di container ta bay subi nan costo, y a puntra presidente di CUA, cu awo hasta hende mericano ta keha cu Aruba ta caro, y nos cu ta importa hopi producto di Merca, kico ta spera nos pais di awo te 2027?
“Ponson ta kere cu si gobierno ta responsable e ta haci un estudio responsable, bay wak ken mester di ayudo di berdad, ken si ken no, y no subsidia pa loco. Ora bo subsidia pa loco, ta subi tur prijs pa loco, y esun den necesidad ta bay mas den necesidad; pues, nos tin cu ta realistico, sinta na mesa y haci e cosnan aki corectamente, y ta honesto di cuanto placa nan ta gana y con nan ta bay subsidia e cosnan di berdad”, segun Ponson.
Presidente di CUA si ta kere cu costo di bida ta bay aumenta mas for di awo pa 2027. “Si mi tende cosnan cu kier wordo haci, mi tin miedo di loke ta bay pasa”, Ponson a expresa.
“E Gobiernonan sa di e topiconan aki, pero ningun hende kier haci un estudio y haci e cosnan aki corectamente. Nos ta prefera haci cos pa loco, gana voto. Nos no t’aki pa gana voto”, Ponton a remarca.
