Social Carrousel 2026 di Universidad a refleha gran interes den e temanan social

Jonathan Trinidad, manager di Social Work & Development:

ORANJESTAD (AAN) — E di cuatro edicion di Social Carrousel 2026 a tuma luga diamars ultimo na Universidad di Aruba, cu participacion di 37 organizacion y departamento di e sectornan social, husticia, salubridad y enseñansa. E actividad, organiza pa Social Work & Development di Universidad di Aruba, a ofrece studiantenan y publico en general e oportunidad pa conoce e servicionan y proyectonan disponibel pa comunidad.

   Durante e actividad, e entidadnan participante a comparti informacion na nan stand y a duna presentacion tocante nan trabao, iniciativanan y contribucion na bienestar di comunidad.

   Den un entrevista, Jonathan Trinidad, manager di Social Work & Development, a splica cu e meta principal di Social Carrousel ta pa brinda studiantenan contacto directo cu e sector profesional y familiarisa nan cu e diferente areanan den cua un trahador social por eherce su profesion.

   Trinidad a destaca cu e aña aki a dicidi di habri e actividad pa henter comunidad, ampliando e oportunidad pa publico tambe ricibi informacion y drenta den contacto cu e organizacionnan participante.

   Segun Trinidad, e gran interes di tanto studiantenan como miembronan di comunidad a contribui na e exito di e di cuatro edicion Social Carrousel.