Respaldo ta introduci “Steunend Relationeel Handelen”(SRH)  como metodologia nobo di guia

ORANJESTAD (AAN):  Pa sigui reforsa e calidad di cuido y guia, Respaldo ta introduci e metodologia di “Steunend Relationeel Handelen” (SRH).

Den colaboracion cu RINO Groep y bou di guia di Jacqueline Zents, “hoofdopleider’ di SRH, a cuminsa un trayecto di entrenamento pa empleado na final di 2024.

            SRH ta un metodologia di guia cu ta enfoca riba fortalece e cliente door di combina e conocemento di experiencia, practica y teoria. E metodologia ta yuda e dunado di cuido pa conecta miho cu e necesidadnan y forsa di e cliente, pa asina e por haya mas control riba su mesun bida.

            Respaldo a tuma contacto cu Jacqueline Zents pa explora si SRH ta e metodologia corecto pa implementa den e organisacion. Den consulta cu e “Manager Behandelzaken”, un trayecto a ser structura cu a cuminsa cu un entrenamiento basico online y lesnan e-learning adicional. Ademas, e secretarianan medico, managers y directiva a tuma parti den seccionnan di introduccion pa compronde e principionan basico di SRH.

            For di 27 di januari 2025, cinco empleado di Respaldo a cuminsa cu e training pa bira coach di SRH. E coachnan aki tin un rol esencial den e implementacion di SRH den e organisacion. Durante e ultimo dia di e curso, representante di “cliëntenraad”, HR, directiva y  behandelaars a sinta hunto pa papia riba e manera con e metodologia lo sigui wordo implementa den Respaldo.

            E metodologia ta yuda e profesionalnan den cuido pa:

- Mehora e coneccion cu e cliente door di haci pregunta cu ta enfoca riba nan deseo, forsa y meta.

- Disminui inseguridad den e guia door di tin un structura claro cu un ‘perfil di forsa personal’.

- Crea un idioma comun den e organisacion, pa hacie sigur cu tur empleado y managers ta traha riba e mes un liña.

            Segun Jacqueline Zents, e forsa di SRH ta cu e no ta un metodologia exclusivamente enfoca riba e malesa, sino riba e deseo y necesidad di e cliente. Esaki ta garantisa un enfoke  mas amplio y personal den e cuido.

            Cu e training aki, Respaldo ta tuma un paso importante den mehora e calidad di guia y sosten, pa asina e cliente por haya un cuido mas optimal durante su proceso di recuperacion y bienestar.