Reservanan di divisa di Aruba ta permanece adecua

Banco Central di Aruba ta afirma

ORANJESTAD (AAN): Recientemente Banco Central di Aruba (BCA) a tuma nota di un articulo publica den un otro media encuanto desaroyo di nos reservanan.

   Pa evita mal comprendimento, pa medio di e publicacion aki, BCA ta elabora y splica mas riba e desaroyonan den e reservanan internacional durante aña 2022 y 2023, cu durante e promer trimester di 2024 ta sigui riba nivelnan adecua.

   Na fin di december 2022, e reservanan internacional a yega Afl. 3.240,4 miyon, cu ta encera un subida di Afl. 109.8 miyon compara cu fin di december 2021. E crecemento den e reservanan durante aña 2022 a resulta primordialmente door di e prestacion robusto di e sector turistico y compra di propiedad na Aruba door di personanan residencia den exterior. Durante aña 2022, e reservanan internacional y oficial tabata adecua di acuerdo cu e indicadornan cu BCA ta monitor.

   Na december 2023, e reservanan internacional a baha di Afl. 3.240,4 miyon (december 2022) pa Afl. 3.061,9 miyon. Factornan principal cu a contribui na e bahada menciona ta e refinanciamento di debenan externo riba e mercado local door di e sector priva, pagonan di dividendo na no-residente y (re-)financiamento di debe internacional den e mercado di capital na Aruba door di gobierno di Aruba. Fuera di tin suficiente divisa, esaki a sosode debi cu e tasa di interes na Aruba tabata mas abao cu e tasa di interes den exterior.

   BCA ta subraya cu aunke e reservanan a baha durante 2023, e reservanan internacional a permanece adecuado di acuerdo cu e indicadornan cu BCA ta monitor. Specificamente, e reservanan internacional a sobrepasa 3 luna di pago riba e cuenta coriente di e balansa di pago y e metrico ‘Assessing Reserve Adequacy’ (ARA) di e Fondo Monetario Internacional (FMI) a keda adecua. Ademas, BCA ta informa cu den e prome lunanan di 2024, ya e nivel di reservanan di divisa a aumenta cu Afl. 199.2 miyon compara cu fin di 2023. Finalmente, BCA ta premira cu e nivel di e reservanan internacional lo sigui ta adecua durante 2024.

   Como autoridad monetario di Aruba y di acuerdo cu e responsabilidadnan stipula den articulo 10 di e ordenansa di banco central, BCA ta continuamente monitor desaroyonan den e reservanan y ta para cla pa actua acaso ta necesario, pa mantene e nivel di e reservanan adecua.