Ursell Arends y demas miembro hopi contento:
ORANJESTAD (AAN) – Dia 15 di Juni awo, e Plataforma Partido Raiz lo ta celebrando su di siete aniversario y den entrevista cu DIARIO, su lider politico, Minister Ursell Arends a expresa cu esaki ta haci e miembronan di Partido sumamente contento.
“Nos tur a traha hunto pa haci y mantene e plataforma aki relevante, y na 2021 ora nos a haya e confianza tambe den comunidad pa forma parti di gobernacion, nos a bin ta implementa durante e ultimo tres añanan, nos vision progresivo cu ta abraza y sostenibilidad como e yabi pa futuro”, Arends a expresa.
El a agrega cu esaki ta loke RAIZ a bin ta haci y lo keda haci tambe y como Plataforma RAIZ nan a bin ta stimula union, no solamente den nos comunidad, pero tambe den gobernacion. “Nos ta laga un banda e parti di division cu ta desempodera. Esaki ta algo cu RAIZ ta boga p’e y nos lo sigui traha p’e tambe. Nos team ta creciendo, esey ta sin duda, locual ta duna nos espacio p’asina aki por cuminza bek regularmente, cu conferencia di prensa, pa nos por combersa y dialoga cu prensa pero tambe trece informacion di nos Plataforma, di nos banda, na e Comunidad di Aruba”, Lider di RAIZ a señala.
El a reitera cu RAIZ ta fortificando su Plataforma y tin miembronan nobo tambe; kiermen ta bay tin caranan nobo cu lo forma parti den su Plataforma, den eleccion 2025 y den su debido tempo nan lo presenta nan pa comunidad.
