Rescate di piscadonan riba lama den oranan di marduga

Orion a tow Aribel bek pa Aruba

*A trece e piscadonan sano y salvo

* A tuma rond di 12 ora pa haya e boto 

ORANJESTAD  (AAN): Dialuna anochi dos persona cu a sali riba e boto Aribel pa bay pisca a wordo confronta cu un situacion di emergencia, ora cu e motor di boto tabata tin problema.

            Na dado momento Warda Costa a wordo alerta y nan a wordo rescata cu helicopter. E boto sinembargo a keda alrededor di 35 miya pa noord di Aruba.

            Diamars mainta a dicidi di manda e boto Orion di Anuar v/v Linden pa tow Aribel bek pa Aruba.

            E tripulacion di e boto a duna conoce na DIARIO cu a tuma nan alrededor di 12 ora total pa bay y haya e boto, pa tow e bek pa nos isla.

            Nan a wordo confronta cu basta awacero y laman bastante bruto, ora cu nan a topa cu e boto alrededor di 40 miya pa noord di Aruba.

            Propietario di Aribel a keda hopi contento cu e rescate y cu el a haya su boto bek.

            DIARIO a haya mas informe. Wardacosta Caribe Hulandes a duna di conoce cu dialuna nochi nan a ricibi un notificacion via di e radio maritimo VHF canal 16, na momento cu un boto tabata indica na un tankero cu el a haya problema riba lama.

            E boto Aribel tabata mas o menos 30 miya west di Aruba y e tripulacion tabata mester di asistencia inmediatamente. E Centro di Operacion Maritimo di Wardacosta mesora a dirigi e helicopter pa e area caminda e boto tabata, pa por yuda e dos hombernan abordo.

            Na yegada na e sitio e helicopter di Wardacosta a asisti e dos hombernan abordo y a hisa nan paden di e helicopter. Despues di a saca nan for di nan boto a hiba e dos hombernan aeropuerto di Aruba, e dos personanan a yega Aruba ‘safe and sound’.

            E boto Aribel a ser rescata pa e boto Orion di Aruba.