IrisGO ta yuda DOW cu solucion di problema di buraco rond nos isla

ORANJESTAD (AAN): Ta conoci cu rond Aruba tin varios caminda cu mester wordo drecha of asfalta,

unda cu tin buraconan entre otro cu ta causa un molester pa habitantenan di bario y sigur automobilistanan cu ta uza e careteranan rond di nos isla.

Pa purba soluciona e problema mihor posibel, DOW ta haci uso di e sistema irisGO.

Daryl Lue den un entrevista a splica cu DOW ta haciendo un inventarizacion cu a cuminza na Januari y ta sigui e luna aki.

Ora cu esaki ta cla, lo inspecciona tur e careteranan.

“Mester bisa si cu pa loke ta e camindanan principal e inspeccionnan lo intensifica pa 3 pa 4 biaha pa luna, mientras cu pa e camindanan di bario e inspeccion lo ta 1 pa 2 biaha pa luna”.

Den e caso aki nos ta bezig tambe cu un programa mas digitaliza, unda cu na dado momento bo ta haya un mapa di unda tur e kehonan ta, mientras cu e data colecta riba irisGo lo wordo publica eyriba, segun Lue.

El a splica cu bo mes por track con ta bayendo cu e solucion pa e problema di buraco y cuanto a dura pa cera e buraco.

“IrisGo ta provee nos data cu nos por provee e clientenan informacion riba unda nos ta bezig y unda a wordo drecha caba”, segun Lue.