DOW ta splica:
*Ta bay aplica e material riba caminda
ORANJESTAD (AAN): Departamento di Obra Publico ta desea di informa comunidad di Aruba ariba un punto cu nan ta hayando basta pregunta.
Cuminsando for di weekend cu a pasa, por a tuma nota cu tin bultonan (saco blanco) cerca di e brug di Green Corridor. Esakinan ta e materialnan pa traha e Micro paving.
Micro Pavement ta un mezcla di polymer modifica, cu ta wordo aplica frieu uzando ekiponan specialisa riba e caminda di asfalt pa alarga e bida di e capa di asfalt.
E ta un sistema conoci mundialmente cu lo bay wordo aplica riba e camindanan cu ta cay bou di e proyecto di Green Corridor.
Micro pavement ta wordo uza unda e caminda a cuminsa perde grip of tin scheurnan fini. Green Corridor ta bay implementa e sistema aki como prevencion pa asina percura pa e camindanan di Green Corridor keda cu e grip necesario y cera e scheurnan fini cu ta normal despues cu e caminda tin algun aña caba.
Na ora di aplica esaki e tin un color bruin y despues di un par di ora cu esaki seca e ta bira preto.
E aña aki, Green Corridor lo cuminsa cu e prome camindanan pa aplica e Micro paving. Nan lo cuminsa for di Yara bay pa Weg Fontein.
Manera cu tin e fecha cu lo bay cuminsa cu e micro paving lo informa na unda trabounan ta bay tuma lugar.
