Reorganizacion di Inmigracion Aruba a drenta su fase final

ORANJESTAD (AAN): Recientemente, durante e celebracion di 53 aña di aniversario di Inmigracion Aruba como un organizacion,

Minister di Husticia y Asuntonan Social Sr. Rocco Tjon, a indica cu pronto e reorganizacion lo keda cla, mirando cu hunto cu DRH ta trahando riba esaki.

   Den e plan di maneho di Ministerio di Husticia y Asuntonan Social, a priorisa aspectonan cu ta regarda personal. Den cuadro di esaki, diahuebs mainta a notifica e tres sindicatonan esta, SEPPA-TOPA-STA, cu lo inicia cu e "plaatsingsprocedure". Esaki, despues cu recientemente conseho di Minister a aproba e ultimo formato di e structura di organizacion, manera a ser palabra cu e sindicatonan.

   Segun e mandatario, e structura di un organizacion ta lo mas importante. A base di esaki, e ta posibel pa, como organizacion, por cumpli cu tareanan, brinda e servicio cu comunidad ta exigi como tambe percura pa un carera digno pa e empleadonan. Inmigracion Aruba ta un organizacion cu tin un tarea importante pa loke ta eleva siguridad na nos frontera. Den cuadro di esaki nan ta forma parti di e "strategisch grensoverleg" como tambe e ehecucion di e "plan van aanpak versterking grensveiligheid". Pa e ultimo plan aki, Hulanda a aloca cuater miyon euro.

   Banda di e tareanan aki, ta hopi importante pa e aspectonan interno ta bon regla pa e trahadonan. Bisando esaki, DRH lo acerca e sindicatonan e siman nos dilanti pa duna splicacion tocante e procedura pa loke ta e "plaatsing". Ta premira cu mas tarda den luna di juli e reorganizacion lo ta completamente finalisa. Asina por menciona, cu esaki lo ta e di dos reorganizacion cu ta keda cla durante gobernacion di Gabinete Wever-Croes II. E siguiente dos reorganizacionnan cu lo tuma luga ta di departamentonan di CEA y GNC.