ORANJESTAD (AAN) – Parlamentario Marco Berlis, di fraccion di MEP, den conferencia di prensa Diahuebs a comenta, cu durante e dianan aki cu a trata presupuesto,
el a trece algun mocion dilanti y entre nan, un pa traha un waf turistico pa e Distrito di San Nicolas.
Berlis ta kere cu tin un oportunidad hopi grandi pa desaroya un proyecto asina, y esaki ta uno cu e ta cargando desde basta tempo, dialogando cu Minister di Salud y Turismo, Dangui Oduber y tambe cu Minister Glenbert Croes, cu tin Refineria di Aruba (RdA) den su cartera y cu ta na unda e terenonan ta.
El a reitera cu tin basta tempo sondeando e posibilidadnan y awo, specialmente, cu e proyecto Eagle LNG. Berlis a subraya: “Na San Nicolas tin un oportunidad hopi grandi pasobra nan ta bay bin cu e proyecto di “bunker station”, na unda cu cruseronan moderno por bay yena gas natural den nan tanki, y automaticamente ora nan ta parando eynan cu nan hendenan, e pasaheronan por baha”, e parlamentario a comenta.
El a agrega cu el a haci e pregunta na expertonan di LNG, y nan a bise cu ta tarda alomenos 6 ora pa refuel e barconan. “Kiermen, tin oranan cu nan por para eynan na San Nicolas, y cu miles di turista por baha y cu tur e beneficionan cu esaki por trece cune, unda tin inversionnan, y lo cuminza bay ariba atrobe cu restaurantnan, comercio, tours y diferente inversionnan cu lo cuminza tuma lugar, y ora nos wak turistanan den block bini, naturalmente, desaroyonan hopi positivo pa San Nicolas, pero tambe pa pueblo en general lo sosode”, Berlis a señala.
El a agrega cu si su mocion pa traha un waf turistico na San Nicolas bira realidad, e lo bira explosivamente positivo pa Aruba. Ademas, el a propone un mocion pa trece diferente tipo di gasoline pa e pueblo, pasobra ta conoci cu e situacion ta dificil, cu prijs di gasoline ta depende di e prijs di bari di petroleo, y esaki ta aumenta constantemente specialmente door di e guera entre Rusia cu Ukraine, y aworaki ta bastante halto y e pueblo ta sintie den su saco, segun Parlamentario Marco Berlis.
El a acentua cu el a bin cu e mocion aki pa ta emphatic cu e dolor di pueblo, pa asina aki por trece pan riba mesa.
