Morto ta cay y dolor ta manifesta su mes den un comunidad di respet - *Pa Arubianonan semper bida y bienestar di tur Arubiano tabata central - *Den pleno pandemia Covid-19 ni dolor causa pa morto ta wordo respeta mas
ORANJESTAD(AAN)—Tin un trabou pa cientificonan riba tereno social traha na Aruba. Un trabou sumamente importante pasobra algo serio ta pasa cu e Pueblo di Aruba, cu ciudadanonan cu semper a biba cu otro.
Ora nos papia di Arubiano, nos ta papia di Arubianismo, un concepto di bida cu a wordo introduci dor di generacion tras di generacion di Arubianonan cu a respeta Dios y hende.
Normanan di mas halto tabata e macuto di balor cu e Arubiano di generacion pa generacion a entrega na otro y cu ta graba den e Himno di Aruba y hasta den economia di Aruba, pasobra turismo a bira exitoso na Aruba debi na e caracter, e normanan y balor di e Pueblo di Aruba.
Ora bisa “Arubiano” ta papia di di hende cordial. Hende di piedad. Hende cu ta biba cu hende.
“Arubiano” ta nifica, lanta mainta y busca inspiracion di cielo pa enfrenta e dia. Ta a base di e moral halto cu e fe di e Arubiano ta contene, Arubiano semper a biba cu Arubiano cu compasion, cu piedad, cooperando cu otro y cuidando bienestar di otro.
Semper rond mundo Aruba tabata conoci pa su patriotismo. Pa su amor pa su suela, pa e hende di Aruba y asina tur otro hende.
Na varios occasion DIARIO a bati alarma pa e realidad di nos costumbernan cu a bay perdi y awe den tempo di Covid-19 ta bini claramente dilanti.
Con por ta posibel cu den Pandemia no ta sigui regla pa evita morto di otro? Con por ta posibel cu na Aruba, e Arubiano no ta mira loke e ta haci cu su pais mas?
Kico a pasa cu Aruba? Kico a pasa cu e Arubiano? Kico a pasa cu balornan di Aruba?
Hospital na Aruba a yena. Arubianonan mester lucha contra morto causa pa Covid-19 den exterior.
Asina mes tin hende cu no solamente no kier vacuna, pero tin problema pa no bisti un mask pa evita cu e malesa ta plama. Asina mes tin hende cu no por sin “café”, “bar” y hasta lugarnan cu antes Arubiano no tabata duna nomber y tabata papia solamente di e sitio caminda nan ta presente.
Arubianonan ta muri. Dolor ta yena cas di Arubiano. Dolor cu nos grandinan cu ni sikiera ta subi caya, ta wordo afecta den nan cas. Dolor pasobra muchanan awor tambe ta wordo menasa pa morto. Dolor tur caminda. Pero ainda tin hende cu ta busca paranda of no kier bisti mask, ta nenga di vacuna pero si kier ta centro di bida.
Critica contra medida. Problema pa autoridad.
Kico a pasa cu Aruba? Kico a pasa cu e Arubiano?
Awe Aruba ta yora! Aruba cu a lucha ta mira con atrobe hende sin piedad ta permiti Covid-19 mata otro pero tambe ta nenga di coopera pa no mester bolbe cera porta di Aruba y asina haci cu hende ta perde nan trabou y nan pan y cu henter comunidad ta wordo afecta.
Kico a pasa cu Aruba? Kende kier midi forsa cu Aruba y e Arubiano pa su propio probecho?
Un historia desconoci pa Aruba ta wordo skirbi awe. Realidad ta mustra dede riba un mentalidad cu no ta di Aruba. Un moral cu no ta Arubano.
Dolor di Aruba ta sclama na Todopoderoso den un situacion caminda cu dos pia ta trapa riba Arubianismo, e bandera cultural, historico y di moral di Aruba cu no por comprende con por a bira posibel cu hende su alma ta sigui baila, sigui gosa mientras otro ta bira nan victima, ta muri! Increibel!
