Renobacion di ex-Warda di Polis Savaneta lo keda cla den 160 dia

Ministro Rocco Tjon a firma contract

• E ta wordo considera awor como monumento 

ORANJESTAD (AAN)- Renobacion di e ex-Warda di Polis na Savaneta lo bay bira realidad.  Diamars mainta Minister di Husticia y Asuntonan Social sr. Rocco Tjon a firma contract cu representante di e compania ALBO Aruba NV como tambe Monumenten Bureau pa loke ta e renobacion di e edificio di ex warda di Polis Savaneta, cual ta un monumento.

   Manera ta conoci, den e plan di maneho di Ministerio di Husticia y Asuntonan Social, e ta importante pa inverti y crea condicionnan pa asina e personal por haci nan trabao na un manera eficiente y sano. Inversionnan pa loke ta trata infrastructura ta hopi importante y asina a bin ta inverti caba den diferente proyecto infrastructural pa e parti di husticia.

   Asina por menciona cu a renoba Brandweer post Sierra (San Nicolas) y pa otro aña a haya aprobacion pa renoba Post Oscar, cual ta e post situa na aeropuerto. Banda di esaki, warda di Polis di playa a muda pa un edificio completamente nobo na Paardenbaaistraat, y e warda na San Nicolas ta worde renoba por completo.

   Pues, awo a toca e turno na e edificio di e ex Warda di polis na Savaneta, cual pa hopi aña tabata un edificio bandona, y awo ta bay worde renoba por completo.

   Ta trata di un inversion grandi di alrededor di un miyon Florin, caminda e trabaonan lo inicia na januari 2024, y lo termina despues di 160 dia pa asina conta cu un edificio completamente renoba. A base di palabracionnan cu Korpschef, e edificio aki ta bay worde uza door di Cuerpo Policial, caminda diferente ekipo di Cuerpo Policial ta bay worde ubica akinan.

   Cu e proyecto aki acerca, Savaneta lo bay conta cu dos edificio pa e cadena hudicial; dos diferente ekipo di Cuerpo Policial lo bay worde ubica na Savaneta. Manera ta conoci e otro ekipo cu lo bay worde ubica na Savaneta, ta e ekipo di e Operation Command Center, cual na e momentonan aki ta bou di renobacion y lo keda cla na April 2024. E ekipo aki ta bay percura pa vigila e imagennan di e diferente proyectonan di camaranan di siguridad.

   Por ultimo, minister Tjon a expresa di ta agradecido na Monumenten Bureau, cu a percura pa henter e proceso di destaho cana debidamente, pa cual e escogencia a cay riba e compania ALBO. Tambe, ta hopi satisfecho cu ALBO a bay di acuerdo pa asumi e responsabilidad pa ehecuta e proyecto aki pa pais Aruba.