Incidente basa riba asilo ta prueba di problemanan comun di Reino
*Refugiado mester ta topico nacional den situacion mundial actual
ORANJESTAD(AAN)—E resultado di eleccion na Hulanda a duna base pa e proceso pa formacion di un Gobierno Hulandes nobo, haya su inicio.
E proceso conoce tres fase y ta cuminsa cu e exploracion di e posibilidad pa forma un Gobierno nobo pa Hulanda y asina pa e gran mayoria den Gobierno di Reino.
E cientifico, prof. dr. Ronald Plasterk, na un momento sumamente importante pa Reino Hulandes, mester acerca tur e partidonan cu a participa na e eleccion 2023 pa Parlamento (Tweede Kamer) Hulandes, pa mira si nan ta dispuesto pa tuma parti na un Gobierno.
E ta e yabi cu ta habri porta pa e proceso, cu tabata antes den man di Rey, pero awor ta responsabilidad di Parlamento Hulandes.
Plasterk lo mester hiba combersacionnan cu dirigentenan di tur partido cu a participa na eleccion.
Pa e por cumpli cu su mision, e mester ta capaz pa splica kico e tareanan cu nan ta acepta ta encera.
Loke Ronald Plasterk mes ta mira como posibilidad pa yega na un Gobierno a bini dilanti den su columna den cual el a splica cu un coalicion di PVV (di Wilders) hunto cu VVD (e partido di Mark Rutte cu a bira e gran perdedor di eleccion) y e dos partidonan nobo, cu ta NSC y BBB, ta un opcion.
Si e opcion aki ta posibel, e mester splica otro siman ora e termina cu su labornan di explorador pa e Gobierno Hulandes, cu lo bira e Gobierno di Reino.
Den combersacionnan sigur lo bini dilanti e situacion total den Reino Hulandes, e problemanan cu por spera pero tambe problemanan comun cu tin den Reino Hulandes y den uno di e temanan mas importante, ta e forma cu mester atende cu refugiado.
Ayera e tema aki sigur a bini dilanti ora Geert Wilders a presenta na un protesta di parti di poblacion di e ciudad Hulandes, Kijkduin, caminda alrededor di 100 refugiado mester haya asilo.
E alcalde, burgemeester, di e lugar a papia cu habitantenan mal contento cu e desaroyo di refugiado, cu ta un problema internacional cu a bira un nucleo di problema nacional den Reino Hulandes.
Wilders a duna su sosten na e personanan cu tabata protesta.
E alcalde a mustra cu e ocasion no tabata momento pa haci politica y Wilders despues a retira.
Informacionnan ta indica cu BBB y NSC, cu ta partidonan nobo, a duna nan opinion di e suceso, cu ta basa riba uno di e puntonan importante riba cual e progreso politico di Wilders ta basa, cu ta e aumento enorme di refugiadonan, cu ta un aspecto cu DIARIO a presenta semper como un problema cu ta exigi union di Reino pa wordo atende.
Un tema cu ta mishi cu e asistencia cu e ser humano mester duna otro, pero tambe e sobrevivencia di un persona na su pais di nacemento.
Tanto Hulanda, como e islanan Hulandes den Caribe, conoce e problema aki cu un tempo a bira central na Aruba ora Nicolas Maduro a duna inicio na su gobernacion, cu a haci cu mas cu 7 Miyon Venezolano a bandona nan pais.
Aruba a wordo confronta cu demanda pa un responsabilidad cu e no por a carga.
DIARIO na hopi ocasion a papia di e necesidad pa Hulanda y Aruba, cu ta comparti e problema creciente di refugiado, cu manera a bini dilanti, ta un problema cu mester wordo soluciona pa medio di firmesa di Nacionnan Uni y accion dirigi contra abuso di poder dictatorial cu ta haci cu hende mester bandona nan hogar.
Esaki ta hiba nos awor na e punto cu como explorador (verkenner) di un gobierno nobo, a nombra Plasterk cu ta conoci cu e realidadnan di Reino tanto como Ministro di Asuntonan Interior di Hulanda como Ministro di Relacionnan den Reino, cu a inclui Aruba.
Den su combersacionnan cu partidonan politico sigur e por duna un indicacion di problemanan comun den Reino, cu mester wordo atende pa Gobierno di Reino, cu den su mayoria ta politico Hulandes.
Sin duda e incidentenan di ayera, cu a duna indicacion di ta topico den circulonan Hulandes politico, lo bini dilanti den su combersacionnan (na un forma informal), ya cu Aruba ta teritorio Hulandes, cu problemanan den cual e pasaporte Hulandes y e calidad di bida den Reino Hulandes, sigur ta bini dilanti.
Como verkenner pa formacion di Gobierno, Ronald Plasterk ta bira un cara conoci pa dirigentenan politico hoben, cu den futuro por bati na su porta y busca su asistencia pa medio di informacion cu e por suministra como conocedor di e parti Caribense di Reino cu e mester a atende pa Reino, a base di Statuut!
