Rene ‘Baba’ Herde a huramenta como Ministro

Bay ocupa espacio reserva pa Mike de Meza

• Cartera di Infrastructura, Energia, y Telecomunicacion
• Parlamento a aproba su credencialnan 

ORANJESTAD (AAN): Diaranson 9 di juli 2025, den presencia di Prome Minister mr. Mike Eman y Minister mr. Wendrick Cicilia y Secretaria di Conseho di Ministro mr. Indra Hassell-Duarte, a tuma luga e huramentacion di drs. Gervais Rene Herde door di Gobernador Alfonso Boekhoudt.

   Despues cu Parlamento a aproba e credencialnan di drs. Herde, un rato despues na Cas Ceremonial, sr. Herde a huramenta como e siguiente Minister di Infrastructura, Energia y Telecomunicacion y ta bira e di shete minister di Gabinete AVP-Futuro.

   Prome Minister Eman a sigura cu e encargo ta den man di un persona cu hopi capacidad, dedicacion y devocion, cu un carera largo den politica y cu a sirbi su pais dignamente. Sr. Gervais "Baba" Rene Herde lo fungi como Minister di Energia mientrastanto cu e candidato ing. Mike de Meza, ta resolve e obstaculo pa e por ta ministeriabel. Apesar cu e proceso por tuma tempo, tin speranza cu ing. de Meza ainda por tuma e cargo como Minister di Energia.

   Conoce mas di Gervais Rene Herde: Conoci como Baba pa tur hende, el a nace na Aruba, den Companashi dia 16 di september 1951. Yiu di Louisa Herde- Amoroso y Felix Romain Herde, negociante, schutter y manager di restaurant. Banda di hunga baseball Herde a pasa su hubentud den e club hubenil di "De Trupialen". E experiencianan di su hubentud den Companashi y "De Trupialen" a forma resto di su bida. Rene a caba Colegio Arubano (HBS-B) na aña 1971, y despues a studia politica, maneho y planificacion di enseñansa na Universidad di Leiden, Hulanda.

   Despues di su estudio sr. Herde a bolbe Aruba y a cuminsa traha pa gobierno insular di Aruba na 1980 y a fungi como miembro di sindicato SIMAR pa hopi aña. Ademas sr. Herde a forma parti den varios comision pa prepara Status Aparte. Despues di 1986 ora Aruba a haya su autonomia, sr. Herde a traha den gruponan di trabao riba e prome plannan pa renobacion di enseñansa, pa e renobacion di formacion di maestro di scol y na e prome plannan pa maneho di idioma y introduccion di Papiamento den enseñansa na Aruba.

   Entre 1987 y 1989 Rene Herde' a traha como hefe di Bureau Organizatie & Efficiëntie encarga cu organizacion di e aparato di gobierno. Entre 1989 y 1992 Herde a traha na Universidad di Aruba entre otro den creaccion di e Facultad Financiero Economico (FEF) y despues a traha den sector priva como director di personal y formacion na Aruba Seaport Resort entre 1992 y 1994.

   Na 1990 Rene Herde a bira miembro di e partido AVP. E tabata miembro di Conseho di Partido durante di tur eleccion sin ta riba lista. Den e periodo aki el a traha cu minister y politiconan di AVP manera Henny Eman, Watty Vos, Manchi Engelbrecht, Mito Croes, Eddy Croes, Digna Lacle-Herera, Mary Wever-Lacle, Glenda Margaretha, Duke Croes, Roly Bislick, Tico Croes, Ike Posner, Benny Sevinger, Mike de Meza y tur minister y parlamentario den añanan 90 te awe 2025. Na 2005 sr. Herde a subi lista di AVP pa prome biaha y na 2009 a drenta Parlamento di Aruba y a bira Lider di Fraccion.

   Den Parlamento a fungi den diferente comision y e ta presidi e comisionnan di 'Finansa & Economia' y di 'Asunto di Reino y Asunto di Exterior'. Na 2017 a clausura su carera profesional y politico, pero a keda activo den partido AVP. Na 2025, Partido AVP a acerca sr. Herde pa bira e Minister Plenopotenciario di Aruba na Den Haag den Gabinete AVP- Futuro.

   Rene Herde tin dos ruman mas grandi, Emile Herde y Bianca Tobin. E ta casa cu Lucy Peterson y tin tres yiu, Paolo, Dinotra y Eva Maria. E tin tres nieto, Zoë, Dex y Ivy.

   Prome Minister Eman a gradici colega Minister di Husticia mr. drs. Arthur Dowers cu a tuma encargo temporal di e ministerio di Energia y Infrastructura, y a percura pa cosnan cana stret.

  Minister Herde a duna di conoce cu e ta cla pa traha. "Traha cu un plan y cu hendenan cu tin experiencia”. Segun Minister Herde, e no ta un ofensa pa ta un pensionado, haciendo referencia na e critica riba media social. Minister Herde sigur no tin miedo pa traha cu e generacion hoben, ta habri pa ideanan nobo y ta conta cu sosten grandi tanto den partido como den parlamento.