Directora di Departamento di Impuesto a enfatisa:
ORANJESTAD (AAN): Luenne Gomez-Pieters, directora di Departamento di Impuesto a duna di conoce cu DIMP ta bezig cerando e cifranan di loke tabata e prome mitad di aña 2025. Relaciona cu esaki el a bisa cu pa loke ta 'toeristenheffing' te cu luna di mei 2025, tin 47 miyon na entrada pa gobierno y specificamente pa Oficina di Turismo, esta ATA Sui Generis y tambe pa TPEF tin un entrada di 65.4 miyon y 2.5 miyon florin na 'toeristenheffing'.
'Toeristenheffing' gran parti ta wordo carga door di e hotelnan, pero tambe no por excclui cu tin e Airbnbnan manera apartamento of cas, cu ta wordo gehuur cu turista of local. E desafio riba e tereno aki ta pa por yega na un number di tur e 'listing' cu tin.
DIMP ta den comunicacion estrecho y trahando den colaboracion cu ATA caminda cu nan ta uza un tipo di 'software' cu por identifica e webistenan y por tin un bista di e 'listings', adresnan cu tin y ta compara e base di datonan di AHATA y di DIMP, Gomez-Pieters a indica.
Esaki ta colaboracionnan cu ta ancra den un MoU of den un convenio caminda e intercambio di informacion ta tuma luga. DIMP a uza e data cu tabatin caba di ATA y a compara kico tin y kico no den nan sistema. A yega na un number caminda cu ta bay specificamente pa registra e propiedadnan aki, el a agrega.
Directora di DIMP a splica cu un hende cu ta pone un apartamento of un cas pa huur ariba un plataforma lo mester tene cuenta cu e lo hay'e cu cobransa di impuesto. Nan no ta liber di impuesto. Ta un deber di cualkier contribuyente cu ta genera entrada pa por paga su impuestonan cu ta relata na e actividad economico.
Si un hende local ta keda den e apartamento of e cas, den e caso ey si tin un excepcion a base di ley cu no ta paga impuesto ariba entrada general. Tin casnan cu ta wordo gehuur pa fiesta, evento, bruid, ricibimento etc, y si esaki ta un actividad economico regular tambe un contribuyente lo por hay'e cu cobransa di BBO.
Si e contribuyente tin un negoshi cu e cas ta den e bookingnan di negoshi, e lo por hay'e cu 'winstbelasting' y si e ta un persona individual e lo por hay'e cu entrada di 'Inkomstenbelasting' cu mester wordo raporta tambe den e formulario, e directora di DIMP a remarca.
Esaki ta keda un tereno cu ainda no tin control total riba dje segun Gomez-Pieters. Mundialmente tin un crecemento grandi den 'other accommodations' compara cu hotel. Esaki por tin diferente motibo y por tin di haber cu prijs, cu e turista ta prefera den ta meymey di e localnan. Pero pa DIMP, ATA y AHATA tambe ta importante pa tin un 'grip' ariba e situacion, principalmente na Aruba, el a agrega.
