Reina Máxima a caba di ricibi su Baret militar

Den futuro e lo bira Luitenant-Kolonel

ORANJESTAD (AAN): Informacion for di Breda na Hulanda, ta indica cu Reina Máxima a ricibi Diabierna su Baret, durante su training militar pa bira Reservista den Ehercito Real na Hulanda.  Di e forma ey, Reina Máxima ta finaliza e prome parti di e lesnan.  Esaki a socede na Kazerne Trip van Zoudtlandt.

   Reina Máxima a wordo asigna como reservista na Cas Militar di Su Mahestad Rey, y for di eynan e ta ricibi training.  E no ta bay wordo asigna na un arma, regimento, ni korps pero lo bay tuima un rol general y amplio den Ehercito Real.  Pesey su Baret lo tin un leon riba un background cora poncea, conoci tambe como e emblema di Staf General of Mayor.  Oficialmente nan a pone e Baret aki riba su cabez pa prome biaha.  Unavez cu e completa tur e training, e lo bay ricibi e rango di Luitenant-Kolonel.

   Reservistanan ta hunga un rol crucial den apoyo na forzanan arma regular, y por wordo yama pa servicio militar.  Reservistanan ta activo den tur ramo di Defensa, y specialmente den tempo di tension creciente.  Traha como reservista ta boluntario, pero no sin obligacionnan.  Tin un serie di reunion obligatorio, manera participacion den ehercicio, dianan teoretico, y mantene habilidadnan militar basico.

   For di temponan pasa caba, ta existi un vinculo estrecho entre Forzanan Arma y Cas Real.  Corda cu Willem van Oranje tabata un comandante di ehercito, pero tambe e stadhouders despues y Reynan cu a sigui tabata dirigi tropanan.

   Rey Willem-Alexander a finaliza su servicio militar obligatorio den Marina Real y despeus a bay den Ehercito Real, y den Forza Aereo Real.  Den Forzanan Arma, como Rey, e ta ocupa un posicion special y tin un funcion militar.

  Despues di a ricibi su Baret, Reina Máxima abraza Rey Willem-Alexander, sigui pa Prinses van Oranje Amalia, y tambe Prinses Ariane.