Plataforma PEL a tene reunion cu varios scol y companianan tecnico

A comparti un monton di detaye hunto

ORANJESTAD (AAN): Recientemente Plataforma Educacion y Labor (PEL) a tene un exitoso reunion di sector tecnico.

   Na e reunion aki, a trece hunto varios scol y compania tecnico pa un dialogo constructivo, e colaboracion y compromisonan comparti den direccion di educacion.

   Plataforma PEL ta gradici ProTec Mechanical Contractors Aruba pa a invita nan tene e reunion den nan sala grandi, pa ofrece un presentacion hopi interesante riba e F-gasses, e trabao cu nan ta haci den e sector, y nan vision pa e futuro di programanan di sector tecnico.  Nan presentacion ta habri e porta pa discusionnan balioso y a ofrece perspectivanan importante riba e desaroyo di educacion tecnico y a necesidad di mercado laboral.

   Hunto cu otro companianan tecnico presente, un monton di informacion a wordo comparti, y a intercambia varios comentario y a discuti plannan concreto di accion pa fortalece e conexion entre educacion y e sector tecnico.

   Esnan cu a atende a mira di cerca e energia y balor di e discusionnan den e reunion.  E bon noticia ta cu e colaboracion aki lo sigui.

   Plataforma PEL lo bay sigui organiza reunionnan di sector pa reforza alianza, comparti conocemento, y avanza hunto.  Asina hunto lo sigui construi un educacion mas solido y un forza laboral tecnico mas fuerte.