Organiza pa Ministro Plenipotenciario di Aruba na Merca
ORANJESTAD (AAN): Minister Plenipotenciario na Washington D.C., señora Zulema Dabian-Erasmus, ta tene un otro sesion virtual pa empodera studiante y profesionalnan di Aruba. E sesion aki ta enfoca riba profesionalnan cu ta interesa den un carera den un organizacion internacional y regional, pero tambe na studiantenan cu ta den caba cu nan estudio y tin ambicionnan internacional.
Hunto cu Ministerio di Asuntonan Exterior di Reino, e sesion virtual lo elabora riba oportunidadnan pa profesionalnan di nos isla traha na organizacionnan internacional y tambe lo trata cual ta e trayecto cu mester encamina. Door di organiza esaki cu Minister Plenipotenciario di Corsou na Washington D.C., sr. Jerome Beeldsnijder, e sesion ta haya un contexto di Reino pa trece e informacion aki na profesionalnan den e parti di Caribe di Reino. E sesion lo tuma lugar diaranzon 3 juni 2026 pa 11.00 a.m. EST y 5.00 p.m. ora di Hulanda.
Representacion di Arubianonan den organizacionnan internacional y regional, manera Nacionnan Uni, Banco Mundial of IMF, por ta beneficioso pa Aruba. E trabao ta forma e profesional na un nivel halto, su red di contacto, su acceso na expertisio, su visibilidad y su conocemento. Esaki e por duna bek na Aruba directamente ora e bin bek of indirectamente door di contribui cu mentorship, conocemento, partnerships y contactonan.
Ademas, door di tin Arubianonan presente den e espacio internacional, Aruba su visibilidad lo incrementa. Aunke e profesionalnan aki no necesariamente ta traha pa gobierno di Aruba, nos por ta sigur cu por vocifera di un banda e perspectiva y realidad di un isla manera Aruba. Di otro banda nos tin nos hendenan cu por comparti bek cu Aruba ta na unda tin oportunidadnan beneficioso cu nos no ta wak di biaha. Nan ta nos ‘eyes and ears’ den diferente plataforma internacional.
Hulanda pa medio di Ministerio di Asuntonan Exterior ta sostene profesionalnan Hulandes ya di hopi tempo pa tin representacion di Hulanda den plataforma internacional. Despues cu e Nationale Coordinator Internationale Functies (NCIF), señora Anita Conijn, a hiba combersacion cu Minister Plenipotenciario, señora Dabian-Erasmus riba e trabao di NCIF y cu e ta conta tambe pa profesionalnan di Dutch Caribbean, djey a surgi e idea pa trece e informacion aki na nos profesionalnan y studiante. Banda di e presentacion di Anita Conijn (NCIF), tambe lo tin un testimonio di Vanessa van Dijsseldonk, trahando actualmente pa gobierno di Corsou, riba su experiencia trahando den Nacionnan Uni.
Pa participa bo tin di registra na:
Ta invita tur studiante y profesional pa participa na e sesion virtual, Empowering Dutch Caribbean Talent-Careers in International Organization, cu lo tuma luga diaranzon 3 juni 2026 pa 11.00 am (ora di Aruba) cu ta 5.00 pm ora di Hulanda.
