Red Arubiano di Prensa Profesional tambe a celebra Dia Internacional di Hende Muhe

ORANJESTAD (AAN0: Den cuadro di Dia Internacional di Hende Muhe, Red Arubiano di Prensa Profesional (RAPP)

na final di luna di maart a organiza e workshop “Empowering Women in Media” cu enfoke riba e visibilidad di e trabao y contribucion di hende muhe den media.

   E workshop aki a tuma luga na ATIA su conference room y tabatin como orador señora Belquis Moreu kende ta un Facilitator, Corporate Trainer and Motivational Speaker. El a tene un presentacion den cual el a trece dilanti diferente topico pa loke ta trata e trabao di hende muhe den media na Aruba, un di nan ta kico ta nifica e poder femenino y con por uz'e. Un workshop ameno cu a conta cu e presencia di varios periodista, PR di diferente instancia y hendenan muhe cu ta envolvi den trabao di media na Aruba.

   Esaki ta un di e varios proyectonan cu Red Arubiano di Prensa Profesional ta bin haciendo for di momento cu a wordo funda dia 25 di september 2024. Ademas di esey, tabata e momento pa introduci un miembro nobo den e board, e periodista Lelicia Tromp ken awor ta fungi como Tesorero di e asociacion aki.

   RAPP ta un organizacion sin fin di lucro cu ta encurasha e practica di periodismo liber y alaves ta stimula uzo di normanan halto di comportacion etico. RAPP ta traha pa inspira y educa periodistanan actual y futuro pa medio di desaroyo profesional; y ta proteha garantianan di derechonan fundamental di libertad di expresion y prensa a traves di su esfuersonan di defensa.