CBN Noord cu un anochi unda a honra cinco legado di Noord

ARUBIANO a honra cada uno cu replica di Birgen di Alto Vista

ORANJESTAD (AAN): Despues di e gran exito cu a acompaña e lansamento di “Noordflix”, recientemente a sigui cu Episodio 5.  Mirando e hecho cu Noord ta un di e districtonan di Aruba cu a experimenta hopi crecemento y inmigracion den ultimo añanan, Centro di Bario Noord a tuma e iniciativa pa desaroya un proyecto educativo y cultural. Esaki ta realisa na forma di un serie di presentacionnan visual interactivo, cu e meta pa conecta tanto e hendenan di Noord como esnan cu a yega biba aki, cu e historia rico, identidad y tradicion di e Noord.

   E proyecto “Noordflix - Bin conoce bo Districto” a cuminza na 2024 cu su prome episodio, basa riba e tema “Historia di Noord,” presenta pa Sr. Vivianno ‘Vi’ Frank.  Riba Diahuebs cu a pasa, Noordflix tabatin Episodio 5, cu un enfoke special riba “Legadonan di Noord,” reconociendo y celebrando e personanan cu a contribui significativamente na desaroyo y bienestar di Noord.

   E evento a tuma luga na Centro di Bario Noord, unda esnan presente a haya chens di conoce y honra e legado di e figuranan cu a yuda forma Noord manera nos ta conoce awe. President Kathy Ruiz-Paskel a entrega acto di gradicimento na Pedro ‘Perucho’ Gonçalves, tambe Jufr. Francisca Duarte, Frans Wolff, Jacobo Pedro Henriquez, y Violeta Frans.

   E anochi aki, ARUBIANO Local Brand a haci entrega di imagen, replica exacto di Birgen di Alto Vista na e cinco legendarionan aki di Noord.  E entrega a wordo haci door di Eva Wever di ARUBIANO.