PR di DAS, Marceylaine Paskel:
ORANJESTAD (AAN): Departamento di Asuntonan Social (DAS), 23 di maart ultimo a entrega oficialmente nan "Meerjaren Strategisch Beleidsplan 2026-2030" na Minister di Salubridad, Asunto Social, Cuido di Adulto Mayor y Maneho di Adiccion, Sra. drs. Mervin Wyatt-Ras.
PR di DAS, Marceylaine Paskel den un entrevista recien cu DIARIO a indica cu e documento aki ta pa duna e departamento un rumbo fiho den su maneho pa e aña nos dilanti, cu ta un plan pa henter nos comunidad.
DAS ta forma parti di e proyecto ISO. Esaki ta un organisacion di standarisacion international unda cu ta duna oportunidad na organisacionnan pa evalua su maneho y su servicio pa henter e comunidad.
Señora Paskel a indica cu actualmente DAS ta haciendo diferente cambio entre otro riba branding nobo, y localidad renoba. Pero mas importante pa DAS ta loke e clientenan ta mira basa riba e servicionan cu nan ta ricibi. Pa cu esaki, DAS ta haciendo un encuesta bou di su clientenan pa evalua loke mester mehora.
Siguiendo e standarisacion di ISO, DAS ta ehecuta e cambionan aki y pa haci nan servicionan mas accesibel. Ta purba di innova su servicionan pa informa y conecta miho cu clientenan. Ya caba tin e asistencia via WhatsApp cu ta facilita e comunicacion cu comunidad. Tambe ta trahando riba e renobacion di e website. Awo ya caba por haci peticion pa sosten financiero (bijstand) via e website.
“DAS ta purba di keda mas conecta cu comunidad. Esaki ta encera pa duna informacion corecto como tambe e guia y e sosten cu comunidad tin mester pa tur proceso y servicio cu DAS ta brinda”, Paskel a remarca.
