RBC ta dunando aporte na e exposicion di prensa 'E Lens di mi Wowonan' durante 17 aña caba

ORANJESTAD (AAN): Durante un conferencia di prensa diamars mainta, Sra. Joanaila Geerman-Lacle (Branch Manager Aruba) y Sr. Leo Vrolijk,

a elabora riba e di 17 exposicion “E lens di mi wowonan” cual ta wordo organisa den cuadro di celebracion di Dia di Prensa, dia 1 di september awo.

            Sra. Geerman den nomber di RBC a cuminsa felicita tur e miembronan di prensa pa e celebracion di e dia aki y a reconoce e trabou importante cu prensa tin den e comunidad. “Sin Prensa nos no por wordo informa debidamente. Na Aruba nos tin e privilegio di wordo informa via tur e medionan di comunicacion di tur locual ta pasa den nos comunidad den fraccion di algun minuut cu algo a caba di sosode. Nos ta realisa tur dia e trabou balioso cu nos miembronan di prensa tin trahando dia y anochi. Masha danki pa boso dedicacion”, Sra. Geerman a expresa.

            Bayendo riba e exposicion, Sra. Geerman a señala cu RBC ta sumamente orguyoso di ta un biaha mas e patrocinador di e exposicion di prensa “E lens di mi wowonan”. “Tur aña e Exposicion ta un exito y nos ta sigur cu e aña aki e di 17 edicion lo ta mas exitoso ainda”. Di e forma aki RBC  ta contribui na desaroyo di prensa na Aruba y ta duna Prensa e elogio y respet cu nan ta merece.  

            Sr. Vrolijk di su banda a expresa palabranan di gradicimento un biaha mas pa RBC cu ta kere den su proyecto y ta brinda oportunidad nan nos miembronan di prensa di mustra nan trabounan den transcurso di aña. Na mes momento comunidad ta haya oportunidad di wak mas di cerca parti di e trabou di un miembro di prensa atrabes di potretnan capta.  “E aña aki tin alrededor di 225 potret cu lo ta participa den e exposicion aki. Adicionalmente, e aña aki nos ta pone enfasis riba e 60 aña di existencia di TeleAruba.

            Mi ta sumamente contento cu tur aña mi coleganan di Prensa ta contribui grandemente cu e Exposicion”, Sr. Vrolijk a bisa. E exposicion lo ser dedica na tres persona hopi conoci den mundo di periodismo y fotografia, Sr. Hilario Doncker, Sr. Cornell Dijaoen, y Sr. Richard Lacle. E premio di Djispie Franken ta wordo otroga e aña aki na Sr. Albino Tromp. Sr. Doncker y Sr. Lacle cu tabata presente durante e conferencia di prensa a keda sumamente contento cu e reconocimento pa nan trabou incansabel. Nan a elabora riba dia di prensa y nan experencia den periodismo y como fotografo di prensa.

            Tur miembro di Prensa ta ser invita pa e apertura di “E lens di mi wowonan” cu lo habri diabierna awo dia 1 di september pa 7.30 di anochi na Biblioteca Nacional Aruba.

            Despues e exposicion aki lo keda habri pa publico general entrante dialuna 4 di september te dia 30 di september na Biblioteca Nacional Aruba entre 8.00 am y 5.00 pm. Entrada ta gratis.

            Pa cita por yama 561-6748 pa ricibi guia of splicacion tanto individual como pa grupo- y scolnan.

            RBC ta duna pabien na prensa di Aruba pa e “Dia di Prensa” riba 1 di september venidero. Pueblo di Aruba ta keda cordialmente invita pa bishita e exposicion.