Embahador di Union Europeo y partnernan local a bishita edificio Maria Convent bou renobacion

E trabounan di rehabilitacion maneha door di UNDP a yega 50%

ORANJESTAD (AAN):  Embahador René Van Nes, Hefe di Delegacion di Union Europeo na Guyana, pa Surnam y cu responsabilidad pa Aruba, Bonaire, Curaçao, Saba, St Barthelemy, St Eustatius y St Maarten, representantenan di Gobierno di Aruba (GdA) y Universidad di Aruba (UA) a bisihita e monumento Maria Convent bou renobacion na Playa.

            E trabounan ta wordo maheha door di United Nations Development Programme (UNDP), como parti di e programa Sustainable Island Solutions through Science, Technology, Engineering and Mathematics (SISSTEM) na UA, bou inciativa di Gobierno di Aruba (GdA).

            E bishita di e hefe di Delegacion di Union Europeo (UE) ta coincidi cu un logro importante di e proyecto, completacion di 50% di e trabounan di rehabilitacion. Ora cu e renobacion ta completo y e facilidad ta muebla, cual ta spera otro aña, e edificio lo ofrece 4 espacio multi-funcional pa duna les na 25 pa 50 studiante, un biblioteca, un auditorio y oficina pa 25 empleado.

            Completamente financia pa UE, for di e 11 European Development Fund (EDF) cu 7.3 miyon Euro, e facilidadnan fisico di educacion, e componente di infrastructura di SISSTEM, ta wordo implementa door di UNDP den cooperacion estrecho cu Monumentenbureau, pa sigura cu aspectonan di patrimonio historico di e edificio ta wordo considera.

            E facultad nobo SISSTEM ta permiti UA ofrece programanan educativo di tercer nivel y tambe haci investigacion den materianan di Ciencia, Tecnologia, Ingenieria y Matematica (STEM). Actualmente, e componente academico di e programa ta wordo implementa door di UA hunto cu Universidad Catolico di Leuven (KU Leuven) di Belgica.

            E facultad ta incorpora practica y polisa di sostenibilidad na nivel academico, aportando na resiliencia di islanan chikito den desaroyo (SIDS), mientras ta avansa diferente di e Obhetivonan Mundial di Desaroyo Sostenibel (SDGs) di Nacionnan Uni na Aruba, sirbiendo como ehempel den Caribe. 

Mas ta sigui 

            Proyecto SISSTEM ta haci posibel cu graduadonan local y Caribense di educacion secundario cu ta busca un carera den ciencia y tecnologia no mester bay den exterior pa acceso na e educacion superior aki. Nan lo por keda den region, cerca di nan cas y cultura cu acceso na educacion di calidad halto den STEM.

            Cu e edificio renoba UA lo ofrece futuro studiantenan mihor condicionnan pa studia aden y orario mas flexibel. Door cu sector publico y priva di Aruba a expresa demanda pa mas profesional den materianan STEM pa desaroya y implementa proyectonan di desaroyo sostenibel, graduadonan di SISSTEM por spera bon resultado riba mercado laboral local, mientras tecnologia nobo ta sigui wordo introduci, industrianan ta surgi y oportunidadnan comercial ta expande.

            E intervencion aki ta relevante pa e Agenda 2023 y ta contribui na logro progresivo di diferente SDG, incluyendo SDG 17: Revitalisa e aliansa global pa desaroyo sostenibel, particularmente e metanan relaciona cu tecnologia, desaroya capacidad y asociacionnan di diferente partner.

            Tambe ta promove e progreso di igualdad di genero - SDG 5 den SDG 7 - Energia pagabel y limpi, SDG 11 - Ciudadnan y Comunidadnan Sostenibel y SDG 4 - Educacion di calidad. E metanan aki ta coincidi cu e SIDS Accelerated Modalities of Action (SAMOA) Pathway, cu ta priorisa desaroyo sostenibel specifico pa e necesidadnan di SIDS.