RIOHACHA: E captura di un ciudadano cu titulo di abogado residente na parti zuid di departamento La Guajira na Colombia,
a wordo treci dilanti e siman aki como un logro di balor grandi pa trankilidad di comunidad, como cu nan ta vincul’e como un persona importante den e organizacion di grupo y di hendenan cu a bin ta comete delincuencia den e region, y cu tin di haber cu sectornan di impacto criminal grandi.
Polisnan a hasta yama un Conferencia di Prensa pa indica cu e persona cu nan a detene, ta uno promotor di crimen, y cu nan ta bay acusa di a planea pa comete asesinato, y cu nan tin suficiente prueba pa mustra un Hues cu el a bin ta comete crimen den diferente forma.
Ta trata di e abogado Diego Luis Parodi Peralta, un homber hopi conoci na La Guajira, specialmente parti zuid di e departamento unda el a bin ta sigui organiza actividadnan di crimen pa hopi aña caba.
E abogado a wordo gara den un di e cayanan di pueblo San Juan na departamento Cesar. E tabata hopi envolvi den delitonan cu a wordo cometi door di e famoso ex-Gobernador di La Guajira, esta Juan Francisco Gomez conoci como ‘Kiko’.
E abogado ta vincula tambe cu e delincuente Marcos Figueroa, conoci como ‘Marquitos’ Figueroa kende ya caba ta deteni y cera den prison.
Polis ta confirma cu nan tin suficiente prueba cu ta demostra cu e abogado ta promotor di varios acto contra ley cu a ser cometi na diferente zona di La Guajira. El a parce di a participa tambe den e asesinato contra e ex-Alcalde di Barrancas, esta e dama Yandra Cecilia Brito Carrillo dia 28 di Augustus 2012 na ciudad di Valledupar.
