Radio Kelkboom a regala Archivo Nacional un piano di balor historico

ORANJESTAD (AAN): Riba Diabierna cu a pasa, Archivo Nacional Aruba a ricibi for di e conocido Emile Kelkboom,

un piano cu tabata parti di e studio di e emisora Radio Kelkboom.  E piano aki tabata worde uza den e programanan live y tambe pa grabacion.

   Hunto cu e piano, sr. Kelkboom a entrega tambe un ehemplar di un disco 78 RPM di e Himno Aruba Dushi Tera, cu a worde graba den studionan di Radio Kelkboom, toca pa Padu Lampe y compaña cu e coro di De Trupialen bao direccion di Frere Alexius.

   Net pa celebracion di Dia di Betico, esaki ta algo memorable pa Archivo Nacional. Durante cu nan tabata habri riba Dia di Betico, un y tur por a pasa wak e piano aki.

   Asina aki un piesa historico tambe ta worde warda pa posterioridad pa e pueblo di Aruba. Archivo Nacional ta yama sr. Kelkboom danki pa e bunita gesto aki.