Gestor Cultural Mirto Lacle a introduci e Novela “Di Carigueña pa Santa Clara” di e Jossy Tromp

Na Biblioteca Nacional:

ORANJESTAD (AAN) — Recientemente a tuma lugar un anochi special, na Biblioteca Nacional, cu e lansamento di e Obra “Di Carigueña pa Santa Clara”, cu ta un novela skirbi pa e ex-docente y autor Jossy Tromp.

            Señor Mirto Lacle, Gestor Cultural, a haci un introduccion di e evento aki y a comenta cu Jossy Tromp a skirbi algun buki previo caba, y tin obranan den tur tres genero: poesia, prosa, novela extenso, cuenta cortico y teatro.

            Fuera di esey, el a documenta, por ehemplo, e ekipo di wega di Bubali. Jossy tabata un educador, forma como Biologo, pues e tin un titulo universitario den Biologia y tambe e ta Hurista ya cu el a gradua den e profesion academico aki.

            Su obra nobo tin como 300 pagina, su titulo ta di “Carigueña pa Santa Clara”. “Kiermen e ta cuminza hinca nos for di inicio di un lugar pa otro, cual punto A pa B ta. Y kico ta Carigueño? Pasobra tur dos ta palabra ficticio, cu no ta existi, pero dentro di esaki, e ta hinca dos ruman cu ta mira un pelicula, y di e pelicula aki e dos rumannan aki ta discuti. Dos ruman cu kier otro bon”, Mirto Lacle a trece dilanti.       

            Lacle a señala cu interesante ta cu e autor ta trece hopi palabra arcaico y semi arcaico bek den e buki aki, pasobra e ta retrospect y den un flash bek bo ta mira cu nan ta bay den pasado di un pais, caminda e ta, anto e pais aki ta bira un Metropolis (lugar grandi) despues. Pero e ta pasa den mesun fase di nace, desaroya y cristalisa. Bo ta mira tur e desaroyo y desafionan c’un pueblo ta haya, prome simpel y despues bo ta mira un lugar crece.

            Den otro articulo lo elabora mas tocante e obra aki, door di su mesun autor.