MetaCorp ta sigui inverti den Aruba:
ORANJESTAD (AAN): MetaCorp y su subsidiario, Gloria, ta anuncia oficialmente un desaroyo nobo pa Aruba, esta “The Balashi Beer Experience”. E atraccion nobo aki lo trece historia di e cerbes di Aruba, Balashi, na bida a traves di diferente proyeccion di video, imagen, efectonan special, exposicion interactivo y weganan, culminando den un ”beer tasting”.
E lo bira un experiencia energetico, innovativo y interactivo consistiendo di 9 escena, caminda e bishitantenan lo embarca riba un biahe den e mundo di Balashi y e “One Happy Island”, cu ta su hogar.
Ta anticipa cu “The Balashi Beer Experience” lo habri den transcurso di aña 2026, cu e meta pa atrae miles di bishitante pa aña, incluyendo turistanan di hotel, pasaheronan di crucero y mas cu claro, e residentenan adulto di Aruba, cu ta forma e curason di Balashi.
Pa garantisa e miho concepto y diseño, a acerca Sandenburg-DST na Amsterdam, e agencia tras di “The Heineken Experience” y varios experiencia di marca premia. Sandenburg-DST a crea e concepto pa “The Balashi Beer Experience” y ta trahando actualmente riba e desaroyo di diseño.
“The Balashi Beer Experience” lo ta ubica den un extension nobo di mas o menos 1.300 m2 na Gloria. E agregamento di “The Balashi Beer Experience” ta un paso grandi den e desaroyo di Gloria como un centro di entretenimento y ta un tremendo adicion den sinergia cu e ofertanan existente manera The Movies, Olive Garden, P.F. Chang’s y Starbucks.
Pa MetaCorp, como e compania di mas bieu na Aruba, inverti den Aruba no ta nada nobo. MetaCorp semper ta mira oportunidad y ta orguyoso di trece experiencia nobo y unico pa pueblo di Aruba y pa nos turistanan. MetaCorp ta kere firmemente den Aruba y cu e inversion aki ta premira no djis un entrada y atraccion nobo pa e isla, pero tambe oportunidad nobo pa trabao, cu ta hopi importante.
Durante e ultimo añanan, hasta durante y despues di pandemia, e compania netamente Arubiano a haci inversionnan grandi den The Movies, expandiendo pa San Nicolas, a inverti den New York Laundry, na Brouwerij Nacional Balashi, den EcoTech, a desaroya ATCO Concrete den APEX, funda EcoGas cu un sucursal na Noord y na San Nicolas y a añadi Antillean Soap Company (ANSO) di Curaçao bou di nan halanan, cu tambe a encera un inversion cuantioso den ekiponan moderno y desaroyo di productonan nobo.
